Ukraina mustaqilligi içün ateşin küreşçi Mihail Gorın vefatı munasebetinen onıñ yaqınları, bütün ukrain halqına Mustafa Cemilev Meclis adından teren taziye bildirdi

15 January 2013

Yanvar 13 künü 83 yaşında belli ukrain dissidenti, uquqqoruyıcı, sovet lagerleriniñ siyasiy mahbüsi, cemaat ve siyasiy erbab, Ukrainanıñ 1-nci çağırılış halq deputatı, mustaqil Ukraina tiklenmesiniñ faal tarafdarı – Mihail Gorın vefat etti.

“60-nci senelerniñ başında ukrain milletiniñ mustaqilligi ve aqları içün SSSR totalitar rejimine qarşı küreşke atlanğan cesür insanlar sırasında bulunğan Mihail Gorın eñ iradeli küreşçilerden biri edi, – denile Meclis reisi bildirgen taziyede. – Aqiqiy demokrat olaraq Mihail Gorın qırımtatar halqınıñ aqları içün de areket etti, qırımtatarlarnıñ Vatanğa qaytqanlarına yürekten sevindi ve daima Qırımnıñ tamır halqınıñ aqları tolusınen tiklenilmesini talap etti”.

Mihail Gorın Ukraina milliy demokratik küçlerniñ qırımtatar milliy areketinen birleşüvi Ukrainanıñ mustaqil inkişafı içün müimligini daima qayd etip keldi. “Qırımtatar halqınıñ aqlarını talap etkende onıñ köstergen areketlerini unutmaq olmaz. Musa Mamut ana yurtta qalmaq içün bütün imkânlarnı qullanğan soñ onı nevbetteki kere Qırımdan çıqaracaqlarında 1978 senesi iyün 28-de özüni yaqtı.

Aynı şu yılda ukrain Öleksa Girnık ukrain halqınıñ ruslaştırılmasına narazılığını bildirerek özüni yaqqan edi. Eki halqnıñ taqdirlerinde beñzer tarafları çoq. Olarnıñ biri-birini añlamasına devletniñ tınçlığı bağlıdır”, dep ayta edi Ukrainanıñ aqiqiy vatanperver evlâdı ve bizim qardaşımız Mihail Gorın”

Elvida dostumız, elvida qardaşımız…