Meclis reisi Qıbrıznıñ Ukrainada Elçisi Evagoras Vrionidisnen körüşti

15 January 2013

Keçken aftanıñ soñunda, 2013 senesi yanvar 13-te Kiyevde Qırımtatar halqı Meclisiniñ reisi, Ukraina halq deputatı Mustafa Cemilev Qıbrıznıñ Ukrainadaki Vefqulade ve Toluvekâletli Elçisi Evagoras Vrionidis ile körüşti. Qıbrız Elçisiniñ ricasınen olğan körüşüv vaqtında E. Vrionidis ne sebepten Meclis reisi Qıbrıznıñ “1974 senesi türk qoşunları tarafından zapt etilgen qısmını ziyaret etip, iç bir kere Avropa Birliginiñ azası olğan ve Ukrainanen diplomatik munasebetlerde bulunğan Qıbrız Cumhuriyetine (adanıñ yunan tarafı) iç kelmegenini” bilmek istedi.

M. Cemilev ise öz tarafından ne Qıbrıznıñ yunan qısmına, ne de Yunanistanğa qarşı iç bir türlü menfiy fikirde olmağanını bildirerek, Şimaliy Qıbrız Türkiye Cumhuriyetini şu devletniñ prezidenti ya da parlamentiniñ davetine köre tantanalı merasim ve konferentsiyalarda iştirak etkenini bildirdi. Bundan da ğayrı Qıbrıznıñ şu qısmında yaşağan türkler qırımtatarlarnıñ soydaşları, çoqları ise Qırımnı Rusiyeniñ işğalinden soñ terk etmek zoruna qalğan qırımtatarlarnıñ ecdatlarıdır.

Elçiniñ mustaqil devlet hududında yabancı türk qoşunlarınıñ bulunğanına Mustafa Cemilev Meclis reisi olaraq nasıl qıymet keskeni aqqında sualine M. Cemilev dedi ki, belli olğanına köre imzalanğan añlaşmalar boyunca Qıbrızda başqa devletler, şu cümleden Yunanistan ve Büyük Britaniya, bunıñ kibi de BMT memleketleriniñ qoşunları da buluna. “Em, türk qoşunları Qıbrızda yunan “qara polkovnikleri” Qıbrız ve Yunanistan birleşip Qıbrızdaki türk cemiyetine basqı etken soñ peyda oldılar, albu ki türk cemiyeti Cumhuriyetniñ 1960 senesinde qabul etken Anayasasınıñ talapları bozulğanına qarşı çıqqan edi, dep qayd etti M. Cemilev. Qıbrıznı bütün yabancı qoşunlar terk etmesi içün başta adanı em türk, em yunan qısmını qanaatlendirgen şaraitlerde birleştirmek kerek”.

“Köfi Annannıñ adanı birleştirmek planı” boyunca ötkerilgen referendumda yunan cemiyeti 2004 senesi çoqluq olaraq qoltutmağanını M. Cemilev yazıqsınıp qayd etti. Albu ki, türklerniñ 65 fayızı plannı maqullegen edi.

Subet bir saatten ziyade devam etti. Onıñ soñunda E. Vrionidis Meclis reisini oñaytlı bir vaqıtta Qıbrıznı ziyaret etmege davet etti. Qırımtatar halqı Meclisiniñ reisi, Ukraina halq deputatı Mustafa Cemilev Qıbrıznıñ Ukrainadaki Vefqulade ve Toluvekâletli Elçisi Evagoras Vrionidisniñ davetini memnünlikle qabul etkenini bildirip, öz nevbetinde Elçi cenaplarını Qırımğa mındaki yunan cemiyeti vekillerinen körüşmek içün musafirlikke çağırdı.