Poloniyalı uquqqoruyıcılarnıñ beyanatı

04 January 2013

Poloniyada Ukraina Prezidenti ve Ukraina Yuqarı Şurasına Qırımda milletler ve dinlerara davağa alıp kelebilecek rus ekstremist teşkilâtlarnıñ faaliyetini yasaq etüv aqqında muracaat altında imza toplav boyunca aktsiya devam etmekte.

Poloniyada belli uquqqoruyıcılar, “Solidarnost” gizli teşkilâtı şarq bölüginiñ sabıq azaları Petr Hleboviç ve Yadviga Hmelevskaya Ukraina Prezidenti ve Ukraina Yuqarı Şurası, şunıñ kibi de halqara cemaatçılıq ve OSCE devletlerine “STOP prowokacjomnaKrymie! – Qırımda fesat toqtatılsın!” muracaatını qabul ettiler. Muracaat 2012 senesi dekabr ayında Qırımda qırımtatar halqına nisbeten yapılğan soñki provokatsion areketler munasebetinen qabul etildi.

Onda qayd etile ki, soñki vaqıtta Qırım telükeli adiseler meydanına çevrildi. Buña 2012 senesi dekabr 1 gecesi Molodöjnoye qasabasında qırımtatarlarnıñ 100-den ziyade muvaqqat evçiklerini yıqqan ve aynı şu gecede Cuma Cami qurulacaq yerdeki qaravulğa tecavuz etken “Russkoye yedinstvo” partiyası ve “Yedinstvo” birleşmesine kirgen kazaklarnıñ areketleri sebepçi oldılar.

Muracaatta “solaki vatanperver” Sergey Kürginân yetekçiligindeki “Sut vremeni” teşkilât Aqmescitte insanlıq tarihında misli körülmegen vahşiy cellât İosif Stalin doğğanınıñ 133 yıllığına bağışlanğan sergi teşkil etkeni, Qırım akimiyeti ise buña izin bergenine taacüp bildirile. Sergi teşkilâtçıları qırımtatar halqınıñ 1944 senesi sürgünligini İosif Stalin tarafından yapılğan eyilik diye tanığanları keder ile qayd etile.

Bu munasebetnen muracaat müellifleri Qırımda milletlerara ve dinler arasında dava qozğayabilecek bir sıra ekstremist teşkilâtçılarnıñ
faaliyetini yasaqlamaqnı talap eteler. Olar OSCE devletlerini Ukrainadan ne içün dünya cemaatçılığını qatil dep tanığan kimseni onıñ hududında müsbet şahıs olaraq köstergenlerini añlatmaqnı talap etmege çağırdılar.

Muracaat ve imza toplav  http://www.activism.com/pl_PL/petycja/stop-prowokacjom-na-krymie/41545  saytında teşkil etildi.

Bunıñ kibi de muracaat şu mustaqil saifede de yerleştirildi  http://wpolityce.pl/artykuly/43944-petycja-do-prezydenta-janukowycza-oraz-do-wierchownej-rady-ukrainy-o-wydanie-calkowitego-zakazu-dzialalnosci-rosyjskich-bojowek-na-terytorium-krymskiej-autonomii

Muracaatnı Poloniyanıñ 100-den ziyade meşur siyasetçileri, cemaat, medeniyet erbapları, jurnalistler imzaladılar. Olarğa Beyaz Rusiye, AQŞ, Estoniya vekilleri qoşuldılar.

Olar arasında :

Petr Hleboviç – uquqqoruyıcı, jurnalist, “Solidarnost” gizli teşkilâtı şarq bölüginiñ sabıq azası, Solidarnost teşkilâtı mustaqil şarq bölüginiñ ortaq reisi, Qırım Forumınıñ azası.

Yadviga Hmelevska – uquqqoruyıcı, “Solidarnost” gizli teşkilâtı şarq bölüginiñ sabıq azası, Solidarnost teşkilâtı mustaqil şarq bölüginiñ ortaq reisi, jurnalist, Poloniya jurnalistler birligi idaresiniñ azası.

Zenon Poznâk – belorusiyeli siyasetçi ve cemaat erbabı, uquqqoruyıcı, “Martirolog Belarusi” (1988) teşkilâtı ve Belorusiye halq cebesininiñ esasçısı, “Adracenne” Belorusiye halq cebesiniñ esasçısı ,Konservativ-Hristian partiyasınıñ başı. 1990-1995 senelerde Belarus Yuqarı Şurasınıñ deputatı, Halq cebesi fraktsiyasınıñ lideri, al-azırda AQŞda yaşay. 1994 senesi Belarus Cumhuriyeti prezidentligine namzet oldı;

Tatyana Yankeleviç – sovet uquqqoruyıcısı, QIRIM FORUMınıñ azası;

Musa Taipov – İçkeriya Çeçen Cumhuriyetiniñ Frenkistan Cumhuriyetindeki Elçisi;

Vardan Arutünân – sovet uquqqoruyıcısı, QIRIM FORUMınıñ azası

Yeji Darskiy – Poloniyanıñ belli siyasetşınası, muhacir, “Parijskaya kultura” (1980gg.) medeniy derginiñ muarriri;

Selim Hazbiyeviç – Poloniya tatarlar birliginiñ reisi, Ölştindeki universitetniñ professorı, felsefe doktorı;

Nadejda Bançik – Lvovda doğğan, AQŞda yaşay, “Zapad-Vostok” gazetasınıñ ştatsız mühbiri, Amerika muhacirler matbuatınıñ jurnalisti;

Mussa Çahorovskiy – Poloniyada yaşağan tatar şairi, Poloniya tatarları musulman birliginiñ azası, “Tatarskaya jizn Polşi” mecmuası muarririniñ muavini;

Brunon Ponikevskiy – sabıq siyasiy mahbüs;

Leonardos Vilkas –uquqqoruyıcı, Litvaniya azatlığı içün küreşçi, meşur terciman;

Valeriy Kalabugin – ugrofinn halqları dünya kongressiniñ kâtibi, QIRIM FORUMınıñ azası, “Azatlıq” radiosınıñ sabıq mühbiri;

Öles Şevçenko – sabıq ukrain siyasiy mahbüsi, uquqqoruyıcı, Ukraina cumhuriyet partiyasınıñ sabıq yolbaşçısı, Ukraina Helsinki birliginiñ tesisçisi, QIRIM FORUMınıñ azası;

Valeriy Buyval – uquqqoruyıcı, “Adracenne” Belorusiye halq cebesiniñ kâtibi

Yanuş Kamodskiy – Stalin devrinde siyasiy mahbüs, Poloniyada yaşağan tatarlar aqqında bir sıra sergilerniñ teşkilâtçısı, etnograf;

Ancey Verter – “Solidarnost” areketi Varşava bölüginiñ azası;

Rişard Nikodem – “Soldidarnost” areketiniñ Sileziyadaki belli erbabı, sabıq siyasiy mahbüs, AQŞ muhaciri;

Dominik Napivodskiy –Toronü Universitetiniñ jurnalisti;

Kşiştof Bzdil – 1979 senesinden mustaqil Poloniya gizli konfederatsiyasınıñ azası, siyasiy mahbüs, Amerika muhaciri;

Petr Zarembskiy – belli rejisser;

Yatsek Filus – Katovitse radiosı direktorınıñ muavini.