Qırımda cellât Stalinge bağışlanğan serginiñ teşkil etilmesi munasebetinen Meclis matbuat hızmetiniñ beyanatı

20 December 2012

2012 senesi dekabr 21 künü Rusiyeniñ “Sut vremeni – Krım” teşkilâtınıñ regional bölügi Aqmescitte insanlıq tarihında eñ vahşiy cellâtlardan biri İosif Stalin doğğanınıñ 113 yıllığına bağışlanğan sergini teşkilâtlandırmaqta. Sergi teşkilâtçıları Stalinni “rus medeniyeti tarihında” eñ nufuzlı devlet yolbaşçısı olaraq taqdim etmekteler. Sergide natsist Almaniyanıñ Stalin medh etken liderleri Gitler ve Ribbentropnıñ da fotolarını numayış etmek planlaştırıla.

Mezkür tedbir Sergey Kürginân meydanğa ketirgen Bütünrusiye “sol vatanperverlik areketi” Qırım regional bölügi tarafından teşkilâtlandırılmaqta. Bugünki Rusiyeniñ bu añlaşılmağan qara bir şahısı Rusiyede demokratik degerliklerniñ inkişafı ve demokratiyağa qarşı çıqıp, SSSR devrindeki cinayetlerni tiklemekni teşviq ete.

Mezkür aktsiya Rusiyeniñ “Sut vremeni – Krım” teşkilâtınıñ regional bölügi tarafından Ukraina devletiniñ cemaat işine qaba qarışuvdır.

Bundan da ğayrı, bu sergi Ukraina Avropada telükesizlik ve işbirlik boyunca teşkilâtta reislik vazifesini eda etip başlağan bir devirde devletniñ itibarını tüşürmek içün yapılğan provokatsiyadır. Bu vaziyette Qırım yolbaşçıları ve şu cümleden Ukraina telükesizlik hızmeti ve içki işler nazirligi kene de tıpqı keçenlerde Aqmescit rayonındaki Molodöjnoye qasabasında qırımtatarlarnıñ muvaqqat evçikleri “Russkoye yedinstvo” partiyası faalleri tarafından bozulğan vaqtındakisi kibi añlaşılmağan bir pozitsiyanı aldılar.

Şu munasebetnen biz Ukraina Prezidenti Viktor Yanukoviçniñ diqqatını Qırımdaki Rusiye teşkilâtlarınıñ cemaatımız içün havflı provokatsiyalarına diqqatını celp etemiz.

Qırımtatar halqı Meclisiniñ matbuat hızmeti