Aqyar regional meclisniñ reisi olaraq Enver Mamutdinov saylandı

24 November 2012

2012 senesi noyabr 24 künü ötkerilgen Aqyar regionı qırımtatarları konferentsiyasınıñ işinde yerli meclislerniñ oktâbr 20-de saylanğan 38 azasından 36 neferi iştirak etti.

Qırımtatar halqınıñ öz özüni idare etüv organları aqqındaki nizam boyunca konferentsiyanı Yerli meclislerge saylavlarnı azırlav ve keçirüv boyunca komissiyanıñ reisi Refat Çubarov alıp bardı.

Konferentsiyada Qırımtatar halqı qurultayı Teftiş komissiyasınıñ reisi Qurtseit Abdullayev, Meclis azaları Ali Hamzin ve Zair Smedlâyev, Aqyar devlet memuriyeti içki siyaset ve cemaatçılıqnen bağlanuv meseleleri boyunca bölüginiñ başı O. A. Kotlârov, Aqyar şeer şurasınıñ deputatı V.V. Malikov ve yerli meclislerni saylav territorial komissiyalarnıñ azaları iştirak ettiler.

Acı Lütfi ağa konferentsiyanıñ hayırlı ve mahsuldar keçmesi içün dua oqudı. Soñra konferentsiya delegatları açlıq ve siyasiy repressiya qurbanlarınıñ hatırasını bir daqqalıq sukünetnen añdılar. Kün tertibine Aqyar regional meclis reisini saylav ve regional meclis erkânını tekmillev meselesi qoyuldı.

Regional meclis reisligine Talât Suleymanov, Enver Mamutdinov, Ablâmit İzmaylov ve Lemara.Qaybullayevanıñ namzetleri kösterildi. Suleymanov Talât ve İzmaylov Ablâmit öz namzetlerini keri aldılar. Gizli rey berüv bülletenlerine Mamutdinov Enver ve Qaybullayeva Lemaranıñ namzetleri kirsetildi. Reis olaraq reylerniñ çoqluğını qazanğan Mamutdinov Enver saylandı.

Yañı saylanğan reis regional meclisniñ erkânına yerli meclislerniñ reislerinden ğayrı Asanova Diana ve Suleymanov Talâtnı da kirsetmekni teklif etti. Konferentsiya yekünlengen soñ regional meclisniñ birinci toplaşuvı keçirilip, onda reis muavinleri ve kâtip saylandı. Regional meclis reisiniñ muavini olaraq

Suleymanov Talât, kâtibi olaraq ise – İzmaylov Ablâmit saylandı. Regional meclis azaları nevbetteki toplaşuvda iş planını muzakere etmek ve qabul etmekni qararlaştırdılar.

Malümat içün:  Mamutdinov Enver 1975 senesi avgust 21-de Taşkent vilâyetinde dünyağa keldi.

2006 senesi Aqyar milliy tehnikiy universitetniñ idare etüv iqtisadiyatı bölügini bitirdi.

Evli, dört balanıñ babası. Şülü (Ternovka) köyünde yaşay.