Meclis tışqı alâqalar bölüginiñ başı Ali Hamzin Poloniya Cumhuriyeti mustaqilliginiñ 94 yıllığına bağışlanğan bayramda iştirak etti

18 November 2012

Poloniya Cumhuriyeti Baş konsullığınıñ daveti ile Meclis tışqı alâqalar bölüginiñ başı Ali Hamzin Poloniya Cumhuriyeti mustaqilliginiñ 94 yıllığına bağışlanğan bayramda iştirak etti

Merasimde bunıñ kibi de Aqyar şeer memuriyetiniñ resmiy şahısları, Ukraina İçki işler nazirligi Qırımdaki idaresiniñ, şeer cemaatçılığı ve diniy teşkilâtlarnıñ vekilleri bulundılar. Musafirler ögünde Poloniya Cumhuriyetiniñ Aqyardaki Baş konsulı Veslav Mazur viza aluvnı qolaylaştıruv boyunca konsullıqnıñ yapqan işi aqqında malümat berdi. Ukraina ve Poloniya arasında turizm inkişafına sistem yanaşuvnıñ zarurlığını ayrıca qayd etken konsul, bu, turizm saasında yüksek neticelerni elde etmege imkân yaratacağını ayttı.

“Qırım – pek müim bir yer, mında iqtisadiy işbirlik ve turistik biznes içün büyük potentsial bar”, – dedi Veslav Mazur.  Bunıñ kibi de o, Poloniya Cumhuriyetiniñ Aqyardaki Baş konsullığınıñ Qırımda Avropa Birliginiñ yekâne temsilcisi sıfatında köstergen faaliyeti aqqında da ikâye etti.

Poloniya Cumhuriyetiniñ Aqyardaki Baş konsulı Veslav Mazurnen qonuşqan Ali Hamzin Qırımtatar halqı Meclisiniñ reisi Mustafa Cemilevniñ Poloniya Cumhuriyeti mustaqilliginiñ 94 yıllığı munasebetinen hayırlavını oqup, Poloniya cemaatçılığı ve Meclis arasındaki işbirlikniñ mahsuldar inkişafı içün teren minnetdarlığını bildirdi.

Meclis tışqı alâqalar bölüginiñ başı Ali Hamzin Meclis reisi Mustafa Cemilevniñ noyabr ayınıñ başında Berlinde bulunıp, Avropa Hatıra ve Vicdan platformasınıñ işindeki iştiraki aqqında söyledi.