Qirq-Çolpan azilerine eki baştaş tiklendi

12 November 2012

Sürgünlikten evel Cürçi rayonında Qırq-Çolpan köyü bar edi. Şimdi bu köy aqqında  6  yıl evelsi azizlerniñ qabirleri üstünde tiklengen baştaş añdıra. Bu yılnıñ başında azizler baştaşına belli olmağan şahslar tarafından ücüm etilip, o sındırılğan edi.

Bugün Qırq Çolpan köy azizlerine  baştaş yaptırğan Qırım Yuqarı Şurasınıñ deputatı Safure Kacametova, region meclisiniñ azaları ve yerli cemaat toplaşıp, tamir etilgen baştaş  ve yañıdan tiklengen ekinci baştaş yanında azizler ruhuna  dualar bağışlap, qurban çaldıla

Cürçi rayonınıñ Qırq-Çolpan köyü Alkeç (şimdi Alekseyevka) köyünden 2 kilometr avlaqta yerleşken edi. Al-azırda bir zamanlarda büyük dört quyusı, yüksek minareli camisi, namlı medresesi olğan köyni anda-mında yatqan taşlar, binalarnıñ temellerinden qalğan taşlar, virane alına ketirilgen eski mezarlıq añdıra.

Eski zamanlarda bu mezarlıqta Qırq Çolpan azizleri defn etilgen edi. Bundan 6 yıl evelsi “Maarifçi” birleşmesiniñ reisi Safure Kacametova tamırları bu köyden olğan dayısı, AQŞ sakini Şefiq Qurunnen (o, 1924 senesi Qırq Çolpan köyünde doğğan, yaşağan Amerikadan Qırımğa 1994 s. ve 2003s. ziyaretnen kelgende tuvğan köyündeki Azizlerniñ yeri qayda olğanını köstergen ve abide taşı tiklemek ricasında bulunğan edi) beraber Qırq-Çolpan Azizlerine ananeviy baştaş qoydıra. Onı endi merhum olğan eykeltıraş İlmi Ametov yasağan edi.

2006s. baştaş tiklenüv merasiminde yerli cemaatçılıqnen beraber o da iştirak etken edi.

“2012 seneniñ başında baştaş belli olmağan şahslar tarafından bozuldı, cinaiy iş açıldı, amma neticesi alâ daa yoq…”,– dey Cürçi region meclisiniñ reisi Refat Saytablayev. Onıñ teşebbüsinen cemaat toplanıp, cemaat parasına, cemaat emeginen azizler qabirleri taş qoranen sarıp alına, eski baştaş ise tamirlene.

Abide taşına yapılğan vahşiylik aqqında eşitken QYUŞ deputatı Safure Kacametova baştaşnı yañıdan yasatmaq qararını ala ve İlmi Ametovnıñ işini devam etken qızı Zarina hanımğa yañı baştaş sımarlay ve merhum eykeltıraşnıñ şegirti Aleksandr Lukyanov yasağan yañı baştaş Qırq Çolpanğa alıp keline. “Bu sefer taşnıñ sermiyasını esas menim ailem ve şimdi Nyü-Yorkta yaşağan, amma tamırları Qırq Çolpandan olğan tuvğanım Dilek Mergin köterdiler, ciyenim Kemal Kurun da elinden kelgen qadar qoşuldı”, – dey Safure hanım.

Region meclisi ve yerli cemaatçılıq vahşiycesine sındırılğan evel qoyulğan baştaşnı tamir etip yañıdan tiklediler. Olar Azizler etrafına taştan isar yapıp,  qurban çaldılar ve dua merasimini keçirdiler. Endi Qırq-Çolpan köyünde bir abide taşı yerine eki abide tiklendi, kelecekte evelki kibi dürbe de qurulacaq.

Bizim keçmişimizge qol kötergen vahşiyler bilsinler ki, olar devlet qanunları cezasından qaçsalar bile, Alla cezasından qaçıp olamazlar, deyler bu qadimiy yerde yaşağan semetdeşlerimiz.