Berlinde Mustafa Cemilev «kommunist rejimi üzerinden mahkeme»de iştirak etti

08 November 2012

2012 senesi noyabr 8-de Berlinde Avropa hatırası ve vicdanı platforması keñeşi azalarınıñ “Avropada totalitarizm” mevzusında toplaşuvı öz işini başladı.

Platforma faaliyetinen ve teşkilâtnıñ yañı azalarını saylavnen bağlı meselelerniñ muzakeresinden soñ HH asırda kommunist rejimi yapqan cinayetlerni tedqiq etüv boyunca baş maqsadnı amelge keçirmeknen meşğul olacaq İşçi gruppalar meydanğa ketirildi.

Meclis 2012 senesiniñ iyün ayından Platformanıñ azası olaraq Kommunist rejimi üzerinden mahkeme İşçi gruppasına kirsetildi. Gruppada Almaniya, Romaniya, Latviya, Litva ve Sovetler Birliginiñ vekilleri de qoşuldılar.

Milliy Melclis reisi Mustafa Cemilev işçi gruppa azalarınıñ ögünde çıqış yaparken “Kommunist rejimi, KPSS partiyası, onıñ insanğa zıt mevkuresi üzerinden mahkeme alicenap bir iş, insaniyet tarihında misli körülmegen vahşiylikler qurbanlarınıñ hatırasını añmaq olur. Bunı yapmadan sabıq sovetler akimiyeti hududında demokratiya printsiplerine uyğan açıq cemiyet qurulmaz!”, dep qayd etti.

Avropa Hatıra ve Vicdanı Platformasınıñ toplaşuvı ve İşçi gruppanıñ birinci muşaveresi kommunist Almaniya devrinde milliy telükesizlik hızmeti ŞTAZİ apshanesi binasında ötkerildi. 23 yıl evelsi tamam şu künleri 1989 senesi Berlik divarı yıqtırıldı. Bu – HH asırda kommunist rejiminiñ darma-dağın olğanını kösterdi.

Noyabr 9 künü Berlinde Avropa hatırası ve vicdanı platforması keñeşi azaları öz işini devam ettirdiler.