Beloye -5 qasabası 20 yıllığını qayd etti

06 October 2012

Bundan tamam 20 yıl evelsi bu yerde boşluq edi, bugün ise bu – 250 qırımtatar qorantası yaşağan Beloye – 5 qasabasıdır.

Oktâbr 6 künü qasaba qurulğanınıñ 20 yıllığına bağışlanğan bayram ötkerildi. Qasaba sakinleri ve tedbirniñ çoqtan-çoq musafirleri bir yerde toplanıp, keçken yıllar içinde çekken zorluqlarını hatırladılar, kelecekte çezilmesi lâzim olğan meselelerni, maqsadlarını muzakere ettiler.

Yerli meclis reisi, Milliy Meclis azası İslâm Halilov ve onıñ muavini Rustem Abqadırovnıñ qoltutuvında teşkil etilgen bayramnı küneşli ava ve şeñ keyf daa ziyade yaraştırdılar.

Qasaba sakinlerini hayırlamaq içün bayramğa teşrif buyurğan Qırımtatar halqı Meclisiniñ reisi Mustafa Cemilev er keske qaviy sağlıq, küç-taqat tiledi.

“Keçenlerde qasaba sakinleri öz küçlerinen cami qurucılığını başladılar, temeli qoyuldı, tezden divarları qalanacaq”, – dedi bayramda bulunğan Meclis reisiniñ birinci mukavini Refat Çubarov. – Ebet, bu işte olarğa yardım bermek kerek. Eger kim de kim qurucılıqta yardım etip olsa – buyursın”.
Bayramda genç ve istidatlı artistler qasaba sakinlerini öz çıqışlarınen sevindirdiler.