İ. Gasprinskiy adına qırımtatar kütüphanesiniñ yañı binası Türkiye Cumhuriyetiniñ yardımında qurulacaq

04 October 2012

2012 senesi oktâbr 4-te Türkiye Cumhuriyetiniñ Medeniyet naziri Ertugrul Günay iş ziyaretinen Qırımğa keldi.

Ava limanında Nazir Qırımtatar halqı Meclisiniñ reisi Mustafa Cemilev, Türkiyeniñ Ukrainadaki Elçisi Mehmet Samsar, Türkiye Cumhuriyetiniñ Ödesssadaki Baş konsulı Huseyn Ergani ile beraber dünyada yekâne İ. Gasprinskiy adına kütüphanege yol aldılar.

Kütüphane müdiri Gülnara Yağyayeva ve onıñ muavini Leylâ Qadırova Nazirge kütüphaneni kösterip, kütüphaneniñ açılış tarihı, milliy neşirlernen teminlenüv, arhiv ve elyazma malzemeler bölüginiñ işi aqqında ikâye etip, kütüphane ögünde turğan müim meseleler, cümleden oquv, toplaşuv ve simpoziumlar salonı içün yañı binanıñ zarurlığını da tilge aldılar.

Meclis reisi ve kütüphane yolbşaçılarınen qonuşuv devamında Türkiye Cumhuriyetiniñ Medeniyet naziri Ertugrul Günay İ. Gasprinskiyts adına qırımtatar kütüphanesiniñ yañı binasınıñ qurucılığı aqqında şahsen teşebbüsnen çıqacağını işandırdı. Bunıñ kibi de Nazir kütüphane fondlarını türk dünyasına ait neşirlernen teminleycegine de söz berdi.

Türkiye Cumhuriyetiniñ Medeniyet naziri Ertugrul Günay Qırımtatar qadınları birleşmesiniñ ofisini de ziyaret etip, Birleşme reisi Safinar Cemileva ve cemiyet azalarınen subetleşti. Birleşme azaları musafirni qavenen sıyladılar.

Qırım Medeniyet nazirligi hadiminiñ teklifinen Türkiye Medeniyet naziri Ertugrul Günay Qırım etnografiya müzeyinde de bulunıp, “Qırım halqları medeniyetleriniñ mozaikası” daimiy ekspozitsiyanen tanış oldı.

Türkiye Cumhuriyetiniñ Medeniyet naziri Ertugrul Günaynıñ 111 Qaradeñiz iqtisatçıları forumında iştirak etmek içün Yaltağa ketmesinden evel musafirler Kebir Camini de ziyaret ettiler.