Meclis reisi Mustafa Cemilev Türkiye Cumhuriyetniñ Adalet ve inkişaf partiyasınıñ (Akparti) 4-nci qurultayında iştirak etti

01 October 2012

Qırımtatar halqı Meclisiniñ reisi, Ukraina halq deputatı Mustafa Cemilev Türkiye Cumhuriyetniñ Adalet ve inkişaf partiyasınıñ (Akparti) 2012 senesi sentâbr 30-da ötkerilgen 4-nci qurultayında fahriy musafir olaraq iştirak etti

“Büyük millet, büyük quvet – 2023 senesine maqsadımız” – Türkiye Cumhuriyetindeki eñ büyük partiyanıñ 4-nci qurultayı böyle şiar altında keçti. 2023 senesi tesadufen añılmay, o yılı Türkiye Cumhuriyeti qurulğanınıñ 100 yıllığını qayd etecek.

Qırımtatar halqı Meclisiniñ reisi, Ukraina halq deputatı Mustafa Cemilev ile beraber qurultayda Qırım Halqara biznes birleşmesi idaresiniñ başı. Kiyevdeki qırımtatar cemiyetiniñ başı Aslan Ümerov da bulundı.

Türkiye Cumhuriyetniñ Adalet ve inkişaf partiyası (Akparti) 4-nci qurultayınıñ delegatları partiyanıñ baş kâtibi olaraq Türkiye baş naziri Recep Tayip Erdoğannı sayladılar.

Recep Tayip Erdogan 2001 senesi kendisi teşkil etken ve 2002 senesi parlament seçimlerinde ğalebe qazanıp şundan itibaren akimiyet başında turğan partiyağa endi üçünci kere yolbaşçı olaraq saylandı.

Türkiye ükümetiniñ başı özüniñ aman-aman üç saatlik çıqışında siyaset ile bir sırada iqtisadiy meselelerge de toqunıp, Türkiye Cumhuriyeti halqara inqıraz şaraitinde bile ayaqta qala bilgeni ve “işanç ve stabillik” devleti olğanını köstere bilgenini qayd etti. 

fotolar: http://www.akparti.org.tr