Bağçasaray tarihiy-medeniy qoruq ilk kere «Bağçasaray. Tarihı yanımızda» aqşam programmasını taqdim etti

26 September 2012

Sentâbr 25 künü saat 18.30-da Hansaray öz qapılarını açtı. Çoqtan-çoq musafirlerni saraynıñ azbarında qoruqnıñ baş direktorı Valeriy Naumenko ve “Hansaray” Qırımtatarlar tarihı ve medeniyeti müzeyi müdiriniñ muavini Lenara Çubuqçiyeva qarşıladılar.

Ekskursiya başlamazdan evel musafirlerni qoqulı qave ve tatlılarnen sıyladılar. Şeer üzerine qaranıq çökip başlağanda saray boylap aqşam kezintisi başlandı.

Kezintini bestekâr Elvira Emirniñ tılsımlı muzıkası, hanlar, A.S. Puşkin, A. Mitskeviç, L. Ukrainka şiirleriniñ icra etilmesi yaraştırdı. Saraynıñ gece ışıqlarıncan aydınlanğan o ya da bu köşesi sanki masaldakisi kibi meftün etti. Musafirler saraynı kendileri içün yañıdan açıp, hanlar devrindeki zamanğa döngen kibi oldılar.

Kezintiniñ soñunda ise er kesni sürpriz beklemekte edi – Han cami qarşısındaki meydanda “Qırım” ansambliniñ usta sanatçıları Asiye Saale, Dilâver Osmanov, Mayye Anafiyeva ve Elvira Velişayeva eski yır ve oyunlarnı icra ettiler.

Hansarayda böyle tedbir birinci kere ötkerildi. Teşkilâtçılar eñ samimiy alğışlarğa malik oldılar. Kelecekte Bağçasaray. Tarihı yanımızda” aqşam programması tek Qırım sakinleri içün degil de, yarımada musafirleri içün de teşkilâtlandırılacaq.

Şunı da qayd etmek ekskursiyanıñ kontsert qısmı farqlı-farqlı olacaq, er sefer yañı sanatçılar yañı programmalarını taqdim etecekler.