Qalay Milliy Mektebi 15 yaşinda!

25 September 2012

1997 senesi sentâbr 1-de Canköy rayonındaki Qalay köyünde oqutuv qırımtatar tilinde alıp barılğan mektep açıldı. Keçken yıllar içinde mezkür mektep mezunları Qırım, Ukraina, Türkiye, Poloniya universitetlerinde tasil alıp, oca, ekim, adliyeci ve diger zenaat saipleri olıp, Vatanımıznıñ inkişafına öz isseleri qoşalar.

İlk adımlarını pencere, qapısız, harabe bir alda başlağan mektep bugünde-bugün rayon boyunca birinciler sırasına keçken mektep 15 yıllıq yubileyini qayd ete. 

1997 senesi Canköy rayonında yaşağan qırımtatarlar  Qalay (Mayskoye) köyünde harabe alda turğan bala bağçasınıñ binasını milliy mektepke bermek ricasınen yerli  memurlarğa muraacat ettiler.  Amma yerli akimiyet ve Qırım yolbaşçıları buña qarşı çıqtılar. Böyle munasebetni körgen  ana-babalar bala bağçasınıñ binasını zapt etmege mecbur oldılar. Ve sentâbr 1 künü  Qalay milliy mektebiniñ tantanalı açılış merasimi oldı.

Al-azırda mektepte 192 talebe oquy. Aqşamki bölüginde Qalay medresesiniñ 100 talebesi tasil ala. Bilgi ocağınıñ 15 yıllıq yubileyi büyük bayramğa çevirildi. Bayramda mektepniñ oca ve talebeler kollektivleri, olarnıñ ana-babaları, köy cemaatçılığından ğayrı, resmiy musafirler de iştirak etti.

Yubiley merasiminde bulunğan Qırım Tasil ve ilim, yaşlar ve sport nazirliginiñ hadimi Zarema Suleymanova, nazir Vitalina Dzos imzalağan hayırlavnı mektep müdirine taqdim etti. Müdir, oca ve mektepteki çeşit hızmetlerniñ hadimlerine Fahriy yarlıqlarnı Canköy rayon devlet memuriyeti yanındaki tasil bölüginiñ müdiri Viktor Pâtnikovskiy, qırımtatar tili ve edebiyat usulcısı Maire Suleymanova, Canköy rayon şurasınıñ reisi Alöna  Çernikova taqdim etip, teşekkür sözlerini ayttılar.

Tebrik sözlerinen birlikte, mektepke qyımetli bahşışlar da taqdim etildi. Kseroks, yaz kezintisi içün çadır, futbol topları ve başqa bahşışlar balalarnı pek quvandırdı. Qıymetli bahşışlar arasında “Küreş” federatsiyasınıñ reisi Lenur İslâmov federatsiyanıñ kâtibi Enver Üseinovnen yollağan küreş kilimi içün sertifikat ta bar edi. Canköy region meclisi, qomşu Qamaci (Zareçnoye) ve Qurman milliy mekteplerniñ müdir  ve ocaları öz hayırlavlarını bildirdiler.

15 yıl evel mezkür mektepni açqanlardan biri QYUŞ deputatı, “Maarifçi” birleşmesiniñ reisi Safure Kacametova tebrik çıqışında, mektepniñ maddiy-tehnikiy inkişafına yapqan hızmetimizni ileride de devam etecekmiz, dep söz berdi.

Bayram müitinde keçken yubileyde istidatlı talebelerniñ çıqışları bütün iştirakçilerni eyecanlandırdı. Olarnıñ icrasındaki yır ve oyunlar  devamlı alğışlarğa nail oldı. Ana-babalarnıñ  teşekkürleri soñsız edi.