İspaniyanıñ Ukrainadaki Elçisi Qırımtatar halqı Meclisini ziyaret etti

21 September 2012

2012 senesi sentâbr 21 künü Meclis reisi Mustafa Cemilev İspaniyanıñ Ukraindaki Vefqulade ve Toluvekâletli Elçisi Hose Rodriges Moyano ile Meclis ofisinde olıp keçken körüşüvinde Meclis reisiniñ birinci muavini, Bütündünya qırımtatarlar kongressiniñ prezidenti Refat Çubarov, Meclisniñ tışqı alâqalar bölüginiñ başı Ali Hamzin ve Bağçasaray rayon devlet memuriyetiniñ başı İlmiy Ümerov iştirak ettiler.

İspaniya Elçisiniñ yanında İspaniyanıñ Ukraindaki elçihasnesiniñ kâtibi Öriol Eskalas Noyya ve İspaniyanıñ Qırım Muhtar Cumhuriyetinde fahriy konsulı Aleksandr Balhovitin bulundılar.

“Ukraina ispanşınaslar 111 kongressi”ni keçirdigimiz Ukrainanıñ eñ güzel yeri olğan Qırımğa ziyaretimniñ baş maqsadı yarımada halqlarınıñ tarihı ve medeniyetinen tanış olmaq, İspaniya ve Qırımnıñ işbirligi istiqballerini ögrenmek, bunıñ kibi de qırımtatar halqınıñ vaziyetini yaqından körmek edi, – dedi İspaniyanıñ Ukraindaki Vefqulade ve Toluvekâletli Elçisi Hose Rodriges Moyano.

Meclis reisine hıtap eterek, İspaniya Elçisi 2012 senesi sentâbr 18 künü Kiyevde Meclisniñ elçilikler ve Ukrainada akkreditatsiya etilgen halqara teşkilât yolbaşçılarınen keçirgen 2-nci körüşüvinde şahsen iştirak etmek imkânını bergeni içün teşekkür bildirdi.

“Ümüt etem ki, 2013 senesi Avropada telükesizlik ve işbirlik boyunca teşkilâtta reislik yapacaq Ukraina kün tertibindeki eñ müim meseleler sırasına Qırımtatar halqınıñ öz yurtunda aqlarını ğayrıdan tiklev, Ukrainada onıñ telükesizligi ve inkişafını teminlev boyunca halqara forum keçirilmesi meselesini qoymalı, – dep qayd etti İspaniyanıñ Ukraindaki Vefqulade ve Toluvekâletli Elçisi Hose Rodriges Moyano

Ötkerilecek halqara forum perspektivaları, onıñ baş yönelişleri ve formatı aqqında aytırken Meclis reisi ve onıñ birinci muavini elçilikler ve halqara teşkilât yolbaşçılarınen körüşüvniñ neticeleri halqara cemaatçılıq Qırımtatar halqınıñ aqlarını tiklev boyunca Halqara forumnı keçirüv ğayesine tolusınen qoltutqanlarını köstere, dep qayd ettiler.

“Lâkin siyasiy irade yoqluğı ve ukrain siyaset alanınıñ içersindeki qapa-qarşılıqlar Ukraina yolbaşçılarınıñ Halqara forumda iştirakine dair tam munasebetini körmek imkânını bermey, – dep yekün çekti Mustafa Cemilev.

Refat Çubarovnıñ söylegenine köre, Halqara forum meselesinde “Ukraina akimiyetiniñ indemegeni”ni böyle bir fakt da köstere. Yani 2012 senesiniñ ta fevral ayında OSCE Milliy azlıqlar boyunca aliy komissar apparatı hadimleri tarafından işlengen Halqara forum köntseptsiyası Prezident Memuriyetinde yata ve alâ bu künge qadar Knut Vollebek ofisiniñ tekliflerine iç bir türlü seslenüv olmadı”.

Subetniñ devamında Meclis ofisinde ilk defa bulunğan İspaniya Elçisiniñ ricası boyunca o, qırımtatarlarnıñ öz-özüni idare etüv milliy organlarınıñ faaliyetinen tanış etildi.

“Qırımtatar halqınıñ Qurultay ve Meclisi – qırımtatarlarnıñ birligi saqlap qalmağa imkân bergen sistemadır, – dedi Refat Çubarov. – Bu – siyasiy ortaqlarımıznıñ diqqatını çeke, lâkin mezkür sistemanı Ukraina akimiyet organlarına parallel qurulış dep bilgen siyasiy muhaliflerimizni siñirlendire”.

Ukraina ve Qırımdaki içtimaiy-siyasiy vaziyetni talil etüv çerçivesinde İspaniya Elçisi Avropa Birligine kirmege ıntılğan Ukraina devletine Avropa ve cian cemaatçılığınıñ eñ esas talaplarından birini yerine ketirmek – yani topraqlarında yaçşağan milliy azlıqlarnıñ aqlarını qorçalamaq borcludır, degen fikirni bildirdi.