Türkiyeniñ Ukrainadaki Elçisi Mehmet Samsar: «Akimiyet vekilleri ve qırımtatar halqı arasında dialog da özara munasebetleri kibi ep mükemlleşecegine inanamız»

19.09.2012

Türkiye Cumhuriyetiniñ Ukrainadaki Vefqulade ve Toluvekâletli elçisi Mehmet Samsar Meclis yolbaşçılarınıñ elçilikler ve halqara teşkilâtlarnıñ vekillerinen körüşüvleri olarğa qırımtatar halqınıñ Ukrainadaki vaziyetini añlamaları içün ğayet müim emiyetke maliktir, dep saya.  Bu aqta o, Meclis yolbaşçılarınıñ elçilikler ve halqara teşkilâtlarnıñ vekillerinen Kiyevde sentâbr 18 künü olıp keçken er yıllıq 2-nci körüşüvinde çıqışında söyledi.

“Biz qırımtatar halqınıñ qaytması ve Vatanda yerleşmesine yardım etken ukrain ükümetiniñ işini taqdir etemiz”, – dedi Türkiyeniñ Ukrainadaki elçisi ve qırımtatar halqınıñ aqları tolusınen tiklenilgenini, regionda iqtisadiy, medeniy ve sotsial ömürniñ inkişaf etkenini de körmek istegenlerini de qoştı.

Elçi cenapları qayd etti ki, 260 biñ qırımtatarı endi Qırımğa qayttı, lâkin daa pek çoq meseleler öz çezimini beklemekteler. Bu munasebetnen Qırım akimiyeti qırımtatar halqınıñ sotsial ve medeniy problemlerini al etüvde emin areketlerni yapmalı, halqnıñ stabilligi ve ilerilemesini teminlemeli.

“Biz Ukraina ükümetine qırımtatar halqını meskennen teminlev işinde qoltutmağa azır olğanımız alda, Ukrainanıñ “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” Qanunı birinci oquvda qabul etilmesini maqulleymiz ve Ukraina yolbaşçıları kelecekte şu qanunnıñ qabul etilmesini teminler, dep ümüt etemiz”, – dedi Türkiyeniñ Ukrainadaki Elçisi M. Samsar.

Mehmet Samsar emin ki, topraq meselesi köy hocalığınıñ ve mesken qurudcılığı inkişafında pek müim ve aktualdir, mezkür problemniñ çezimi içün Qırım ükümeti ait komissiyanı qurdı..

“Türkiye Qırım ükümetine şu komissiya işine ve qırımtatar halqınıñ mesken meselesini çezmesine qoltutmağa azırdır, – dedi Mehmet Samsar. – Ümüt etemiz ki, demokratiya bir çoq yönelişlerde inkişaf eter ve akimiyet vekilleri ve qırımtatar halqı arasında dialog da özara munasebetleri kibi ep mükemlleşecegine inanamız”

Öz çıqışında Türkiyeniñ Ukrainadaki Elçisi ukrain akimiyetini qırımtatar halqınıñ medeniy özgünligi meselelesine parmaq arasından baqmamağa çağırdı.

“Zanımızca bücetten ayırılğan paralar bu yönelişke qoltutuvnı teminler. Biz ukrain ükümetini bu müim meselelerniñ çezilmesi içün er şeyni yapmalarına çağıramız”, – dedi Samsar.

Maruzasınıñ soñunda Mehmet Samsar dedi ki, Türkiye Ukrainanen birlikte sadece problem meselelerni degil de, kelecekniñ keyfiyetli inkişafını teminlemek içün imkânlarnı aramalıdır.

“Ümüt etemiz ki, qırımtatar halqı probleminiñ çezilmesi, şu cümleden Halqara forum keçirilmesine qoltutuv umumiy strategiya olur”, – dedi soñunda Mehmet Samsar ve Ukrainada çetel yatırımları içün oñaytlı şaraitler yaratılacağına ümüt bildirdi.

Hatırlatamız ki, sentâbr 18 künü Kiyevde Meclis yolbaşçılarınıñ elçilikler ve Ukrainada akkreditatsiya etilgen halqara teşkilât vekillerinen er yıllıq 2-nci körüşüvi olıp keçti.

Mezkür körüşüvde 20-den ziyade çetel devletlerniñ elçilikleri iştirak ettiler.

Körüşüvden bunıñ kibi de Ukraina Prezidentiniñ Qırımdaki daimiy temsilcisi Viktor Plakida, Ukraina Tışqı işler nazirligi ve Ukraina sotsial siyaset nazirliginiñ vekilleri de bulundılar.

Körüşüv “Qırım inkişafı vaqufı” Hayriye teşkilâtınıñ qoltutuvında keçirildi.