AQŞnıñ Ukrainadaki Elçisi Con Tefft AQŞ halqara forum keçirilmesine qoltuta

19.09.2012

“Qıymetli meslekdeşlerim, men şu masa başında epimiz qoltuttığımız maqsadlarnı tam ifade etken Türkiye Elçisini alğışlayım, – dedi AQŞnıñ Ukrainadaki Vefqulade ve Toluvekâletli Elçisi Con Tefft Meclis yolbaşçılarınıñ elçilikler veUkrainada akkreditatsiya etilgen halqara teşkilât reberlerinen körüşüvde.

AQŞ Elçisi qırımtatar halqına qoltutuvda Türkiye ve diger ortaqlarnıñ rolüne yüksek qıymet keskenini bildirdi. Halqara forum meselesini muzakere etüv qısmında Con Tefftniñ aytqanına köre AQŞnıñ diplomatik küçleri Halqara forum ğayesine qoltutqanları ve artıq onıñ maqsadları ve vazifeleriniñ konkret muzakeresine keçmege ister ediler.

“Tekrar şunı aytmaq isterdim ki, bugünki körüşüvde aytılğanlarnı pek müim, dep sayam. Çünki bu qırımtatar halqınıñ medeniy ananelerini saqlav ve onıñ siyasiy problemlerini çezüv işini közde tuta”, – dedi Amerika Elçisi ve şunı da qayd etti ki, AQŞ diplomatik misssiyası qırımtatar halqınıñ zengin medeniy ananalerine qoltutmağa azır ve böyle imkân ileride de peyda olur”.

2012 senesi sentâbr 18 künü Kiyevdeki “Hyatt” ötelinde Qırımtatar halqı Meclisiniñ yolbaşçıları Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüştiler.

Esas maruzalarnen Qırımtatar halqı Meclisi yolbaşçılarınıñ Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüşüvinde Meclis reisi, Ukraina halq deputatı Mustafa Cemilev, Bütündünya qırımtatarlar kongressiniñ prezidenti, Qırım Yuqarı Şurasınıñ deputatı Refat Çubarov, Qırım Nazirler Şurasınıñ reisi Anatoliy Mogilöv, “Qırım inkişafı vaqufı” hayriye teşkilâtınıñ prezidenti Rustem Ümerov, OSCE Aliy Komissarınıñ mesleatçısı Aleksandr Vinnikov, Halqara Forumğa azırlıq çerçivesinde Qırımdaki vaziyet aqqında esabat azırlav boyunca mustaqil ekspertler gruppasınıñ halqara koordinatorı Endrü Vilson çıqışta bulundılar.

Körüşüvge bunıñ kibi de Ukraina Prezidenti Memuriyetiniñ vekilleri, Prezitentniñ Qırımdaki daimiy temsilcisi Viktor Plakida, Ukraina tışqı işler nazirligi hadimleri ve Ukraina içtimaiy siyaset naziri davet etildiler.

Körüşüv “Qırım inkişafı vaqufı” hayriye teşkilâtınıñ qoltutuvında keçirildi