Aleksandr Vinnikov: OSCE Aliy komissarı Knut Vollebek Halqara forum 2013 senesi keçirilmek kerekliginde emin

19.09.2012

OSCE Milliy azlıqlar boyunca Aliy komissarınıñ mesleatçısı Aleksandr Vinnikov Sentâbr 18 künü Kiyevde Meclis yolbaşçılarını Ukrainadaki elçilikler ve halqara teşkilât reberlerinen er yıllıq 2-nci körüşüvinde çıqışta bulunırken şunı qayd etti ki, OSCE Aliy komissarı Knut Vollebek Halqara forum vazifelerini amelge keçirmek içün birinci nevbette Ukraina resmiy akimiyet organlarınıñ iştiraki zarur, dep saya.

“Knut Vollebekniñ 2012 senesi iyül ayında Ukrainağa ziyareti devamında o Ukraina akimiyet organlarına Halqara forum 2013 senesi keçirilmek kerekligine dair tevsiyelerini berdi, – dedi OSCE Milliy azlıqlar boyunca Aliy komissarınıñ üyken mesleatçısı Aleksandr Vinnikov. – Aliy komissar Halqara forum keçirilmesine 2013 senesi OSCEde reislik yapqanı siltem olacağına inana.

Aleksandr Vinnikovnıñ aytqanına köre, OSCE Milliy azlıqlar boyunca Aliy komissarı Halqara forumnıñ keçirilmesi içün Ukraina ükümeti mesüldir, dep saya. “Böyleliknen halqara qoltutuv Ukraina işiniñ neticelerini yükseltir. Kergin meseleler turğan regionlarda ğayet muqaytlıqnen ve tantiminen çalışmaq kerek, – dey Vinnikov, Aliy komissarnıñ fikirini ifade eterek.

Mal-mülk, topraq, til ve medeniyet, akimiyet organlarında vekâletlik, tasil ve avdet meseleleri kibi çezimini beklegen problemlerni ögrenüvniñ mustaqil neticeleri ukrain akimlerge Qırım cemiyetiniñ stabilligi ve qatıluvına yardım eter”.

Aleksandr Vinnikov şunı da haber etti ki, 2013 senesi mart ayında Knut Vollebek Kiyev ve Aqmescitte keçirilmesi planlaştırılğan eki tedbirde – mustaqil ekspertler esabatı ve olacaq Forum iştirakçilerine tevsiyelerniñ resmiy taqdiminde iştirak etecek.

2012 senesi sentâbr 18 künü Kiyevdeki “Hyatt” ötelinde Qırımtatar halqı Meclisiniñ yolbaşçıları Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüştiler.

Esas maruzalarnen Qırımtatar halqı Meclisi yolbaşçılarınıñ Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüşüvinde Meclis reisi, Ukraina halq deputatı Mustafa Cemilev, Bütündünya qırımtatarlar kongressiniñ prezidenti, Qırım Yuqarı Şurasınıñ deputatı Refat Çubarov, Qırım Nazirler Şurasınıñ reisi Anatoliy Mogilöv, “Qırım inkişafı vaqufı” hayriye teşkilâtınıñ prezidenti Rustem Ümerov, OSCE Aliy Komissarınıñ mesleatçısı Aleksandr Vinnikov, Halqara Forumğa azırlıq çerçivesinde Qırımdaki vaziyet aqqında esabat azırlav boyunca mustaqil ekspertler gruppasınıñ halqara koordinatorı Endrü Vilson çıqışta bulundılar.

Körüşüvge bunıñ kibi de Ukraina Prezidenti Memuriyetiniñ vekilleri, Prezitentniñ Qırımdaki daimiy temsilcisi Viktor Plakida, Ukraina tışqı işler nazirligi hadimleri ve Ukraina içtimaiy siyaset naziri davet etildiler.

Körüşüv “Qırım inkişafı vaqufı” hayriye teşkilâtınıñ qoltutuvında keçirildi