Rustem Ümerov: Qırım Halqara Biznes birligi Meclis ve elçiliklerniñ qoltutuvında Qırımnıñ iqtisadiy inkişafı aqqında açıq dialognı başlamaqnı teklif ete

18.09.2012

Sayğılı Meclis reisi!
Aliy cenaplar, hanımlar ve beyefendiler!

Mına endi ekinci kere Qırımtatar halqı Meclisi yolbaşçılarınıñ Ukrainadaki elçihaneler ve akkreditatsiya etilgen halqara teşkilât reberlerinen körüşüviniñ ortaq teşkilâtçısı olğan “Qırım inkişafı vaqufı” hayriye teşkilâtı adından böyle aliy toplaşuvda çıqış yapmaq imkânı berilgeni içün teşekkür bildirem.

İlerilegen memleketlerniñ tecribesi qaviy, semereli, içtimaiy mesül ve teşebbüsçen iş adamları sınıfını şekillendirmek zarurlığından delâlet bere.

Şu munasebetnen Qırım Halqara Biznes birligi ile beraber işlegen ve ögüne yañı kommunikatsion platformanı meydanğa ketirüv vazifesini qoyğan teşebbüsni qısqadan tarif etmege musaadeñizni isteyim.

Bu platforma esasında regional, şu cümleden qırımtatar iş adamlarınıñ Qırım ve sakinleri menfaatı oğrunda semereli çalışmaları mümkün olacaq.

Strategiya tizüv boyunca ekspertler, çeşit saalarnı inkişaf ettirüv mütehassısları, funktsional uzmanlar, içtimaiy yatırım agentlikleri, halqara cemaatçılıq Ukraina ve Qırım ükümetlerinen birlikte, Qırımtatar halqı Meclisiniñ iştirakinde qırımtatarlarnıñ vatanğa qaytmaqta olğanı şaraitinde biz Qırımnı inkişaf ettirmek içün tevsiyeler işlemege areket etecekmiz.

Böyle yanaşuv bütün Qırım cemaatınıñ menfaatlarına da elverişli olğanında eminmiz. Bu işniñ maqsadı olaraq biz milliy ve regional iqtisadiy leyhalarnıñ ögge sürülmesi, Qırım sakinleriniñ yaşayış seviyesini yükseltilmesini belgileymiz. Teklif olunğan müşterek teşebbüs içten ve tıştan qoltutuvnı talap ete.

Halqara eki taraflama elverişli işbirlik ve mütehassıslar arasında tecribe almaşuv Qırım iş adamları arasında içtimaiy mesüliet meseleleriniñ emiyetini köterir, bunıñ kibi de biznes adamlarına öz işlerini inkişaf ettirilmesine doğrultılğan leyhalarnı kerçekleştirmek imkânını berir.

Qırım Halqara Biznes Birligi Qırımtatar halqınıñ Meclisi, ticaret mütehassısları ve iqtisadiy bölük müdirleri yüzünde diplomatik temsilciliklerniñ qoltutuvında öz platforması esasında şu seneniñ özünde Qırımnıñ iqtisadiy inkişafı aqqında açıq dialognı başlamaqnı teklif ete ki, regionda eki taraflama kârlı leyhalarnıñ amelge keçirilmesi ise bu dialognıñ neticesi olur.

Çıqışımnıñ soñunda sizlerge yuqarıda qayd etilgen Qırımda böyle körüşüvni teşkilâtlandırmaq teşebbüsini baqıp çıqıp, onda iştirak etecek şahıslar dairesini belgilemekni teklif etem.

Diqqatıñız içün sağ oluñız.

2012 senesi sentâbr 18 künü Kiyevdeki “Hyatt” ötelinde Qırımtatar halqı Meclisiniñ yolbaşçıları Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüştiler.

Esas maruzalarnen Qırımtatar halqı Meclisi yolbaşçılarınıñ Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüşüvinde Meclis reisi, Ukraina halq deputatı Mustafa Cemilev, Bütündünya qırımtatarlar kongressiniñ prezidenti, Qırım Yuqarı Şurasınıñ deputatı Refat Çubarov, Qırım Nazirler Şurasınıñ reisi Anatoliy Mogilöv, “Qırım inkişafı vaqufı” hayriye teşkilâtınıñ prezidenti Rustem Ümerov, OSCE Aliy Komissarınıñ mesleatçısı Aleksandr Vinnikov, Halqara Forumğa azırlıq çerçivesinde Qırımdaki vaziyet aqqında esabat azırlav boyunca mustaqil ekspertler gruppasınıñ halqara koordinatorı Endrü Vilson çıqışta bulundılar.

Körüşüvge bunıñ kibi de Ukraina Prezidenti Memuriyetiniñ vekilleri, Prezitentniñ Qırımdaki daimiy temsilcisi Viktor Plakida, Ukraina tışqı işler nazirligi hadimleri ve Ukraina içtimaiy siyaset naziri davet etildiler.

Körüşüv “Qırım inkişafı vaqufı” hayriye teşkilâtınıñ qoltutuvında keçirildi