Türkiye Cumhuriyetiniñ Baş naziri Recep Tayip Erdoğan Qırımtatar halqı Meclisiniñ reisi Mustafa Cemilev ile körüşti

14 September 2012

Ukrainağa resmiy ziyaretnen teşrif buyurğan Türkiye Cumhuriyetiniñ Baş naziri Recep Tayip Erdoğan 2012 senesi sentâbr 13 künü aqşam Qırımğa keldi. Şu künü Kiyevde Ukraina Prezidenti Viktor Yanukoviç ve Türkiye Cumhuriyetiniñ baş naziri Recep Tayip Erdoğannıñ körüşüvi, bunıñ kibi de Ukraina-Türkiyeniñ aliy derecedeki Strategik keñeşiniñ toplaşuvı olıp keçti.

Türkiye Cumhuriyetiniñ baş naziri Recep Tayip Erdoğan ve onıñ refiqası Emine hanımnı, Baş nazir muavini Bekir Bozdağ, Tışqı işler naziri Ahmet Davutoğlu, Mudafaa naziri İsmet Yılmaz, Transport ve alâqa naziri Binali Yıldırım, Energetika ve tabiiy resurslar naziri Taner Yıldız, Tışqı iqtisadiy alâqalar naziri Zafer Çağlayan, diger resmiy şahıslarnı Qırımda Belbek ava limanında Milliy Meclis reisi Mustafa Cemilev ve onıñ birinci muavini, Bütündünya qırımtatar kongressiniñ prezidenti Refat Çubarov qarşılap aldılar. Qarşılağanlar arasında Türkiyeniñ Qırımdaki fahriy konsulı Seyran Osmanov, QMPU rektorı Fevzi Yakubov, Meclis reisiniñ mesleatçısı İsmet Yüksel, Meclisniñ Türkiyedeki temsilcisi Zafer Qaratay, ATR birinci mustaqil qırımtatar televizion kanalınıñ esasçısı Lenur İslâmov, Qırım Halqara biznes birligi idaresiniñ başı Aslan Ümerov ve “Qırım inkişafı vaqufı” hayriye teşkilâtınıñ prezidenti Rustem Ümerov de bar ediler.

Ava limanında eken Türkiye Baş naziri ve Qırımtatar halqı Meclisi reisi arasında qısqa dialog olıp keçti. Meclis reisini selâmlağan Türkiye Cumhuriyetiniñ Baş naziri Mustafa Cemilevge nisbeten büyük sayığısını numayış eterek, subetni devam ettirmek içün onı ve Qırım delegatsiyasınıñ azalarını öz qonağına davet etti.

Türkiye ükümetiniñ başı ile beraber Qırımğa Türkiyeniñ Ukrainadaki Vefqulade ve Toluvekâletli Elçisi Mehmet Samsar, Ukrainanıñ Türkiyedeki Vefqulade ve Toluvekâletli Elçisi Sergey Korsunskiy, bunıñ kibi de Türkiye Cumhuriyetiniñ Odessadaki Baş konsulı Husein Ergan Türkiye Cumhuriyetiniñ Baş naziri Recep Tayip Erdoğan Qırımtatar halqı Meclisiniñ reisi Mustafa Cemilev ile resmiy körüşüvi Gaspra qasabasınıñ Türkiye delegatsiyası yerleşken “Sosnovaya roşça” (Çamlıq) ötelinde olıp keçti.

Türkiye Baş naziriniñ muavini Bekir Bozdağ, Tışqı işler naziri Ahmet Davutoğlu, bunıñ kibi de Meclis reisiniñ muavini, Bütündünya qırımtatarlar kongressiniñ prezidenti Refat Çubarov ve QMPU rektorı Fevzi Yakubov iştirak etken körüşüvde Qırımda bir sıra medeniy ve içtimaiy programmalarnıñ, şu cümleden mektep qurucılığı, QMPU maddiy-tehnikiy bazasınıñ kenişletilmesi, Aqmescitte Büyük Cuma cami qurucılığını amelge keçirüvnen bağlı meseleler muzakere etildi.

Türkiye Cumhuriyetiniñ Baş naziri Recep Tayip Erdoğan ve Qırımtatar halqı Meclisiniñ reisi Mustafa Cemilevniñ qonuşmasına qırımtatar resmiy delegatsiyasınıñ azaları Meclis reisiniñ mesleatçısı İsmet Yüksel, Meclisniñ Türkiyedeki temsilcisi Zafer Qaratay, ATR birinci mustaqil qırımtatar televizion kanalınıñ esasçısı Lenur İslâmov, Qırım Halqara biznes birligi idaresiniñ başı Aslan Ümerov ve “Qırım inkişafı vaqufı” hayriye teşkilâtınıñ prezidenti Rustem Ümerov de qoşuldılar.

Yarım saatten ziyade devam etken körüşüvniñ soñunda onıñ iştirakçileri Ukraina ve Türkiye arasında eyiqomşulıq munasebetleri pekitilmesiniñ müimligini qayd etip, bu munasebetler Vatanına qaytmaqta olğan qırımtatar halqınıñ ğayrıdan tiklenmesi ve inkişaf etmesinen bağlı meselelerniñ çezilmesine de siltem olacağına eminligini bildirdiler.