Aqyarda yerli meclislerge saylavlarğa azırlıq başlandı

05 September 2012

Aqyar regionında yerli meclislerge saylavlarnı teşkilâtlandıruv ve keçirüv maqsadında 2012 senesi avgust 23-24 künleri Yerli meclislerge saylavlarnı azırlav ve ötkerüv boyunca komissiyanıñ reisi Refat Çubarov ve komissiya kâtibi Zair Smedlâyev şeerde ve onıñ civarındaki köylerde yaşağan semetdeşlerimiznen bir sıra toplaşuvlar ötkerdiler.

Olarda territorial saylav komissiyaları azalarınıñ cedvelleri tekmillendi. Milliy öz-özüni idare etüv maalliy organlar aqqında nizamname boyunca saylavlarnı azırlav ve keçirüvnen bağlı bütün vazifeler bu komissiyalarnıñ boynuna yüklene.

4 sentâbr künü Aqyar şeerinde saylav komissiyalarınıñ reisleri, kâtipleri ve azaları içün keçirilgen ameliy seminarda komissiyalarğa saylavlarnı azırlamaq içün zarur malzemeler berildi. Seminarnı Saylav komissiyanıñ reisi Refat Çubarov ve kâtibi Zair Smedlâyev keçirdiler. Seminarnıñ işinde bunıñ kibi de Qurultay Teftiş komissiyası reisiniñ vazifesini eda etici Qurtseit Abdullayev iştirak etti.

Seminardan soñ Refat Çubarov, Zair Smedlâyev ve Qurtseit Abdullayev Aqyar regional meclisiniñ reisi Reşat Memetovnen körüşip, yerli meclislerge saylavlarnı keçirüvnen bağlı bir sıra meselelerni muzakere ettiler.

Böyleliknen 2012 senesi sentâbr 5-te Aqyar regionında saylavlarğa azırlıq başlandı. Bu yerde yaşağan ve yerli mecliske saylanmağa istegen qırımtatarlar ve olarnıñ aile azaları namzet olaraq qayd etilmesi içün eki afta berile. Öz namzetini kösterecek insan territorial saylav komissiyasına arizanen muracaat etip, oña qoltutacaq saylavcılarnıñ imzalarını toplamaq içün imza kâğıtlarını almaq kerekler.

Aqyar regionında yerli meclislerni saylav Yerli meclislerge saylavlarnı azırlav ve ötkerüv boyunca komissiyanıñ qararı boyunca 2012 senesi oktâbr 20-de olıp, saat saba 8-den aqşam saat 20-ge qadar keçecek.