Bütündünya qırımtatarlar kongressi koordinatsion keñeşiniñ azası Nusret Cemilev «Dustlik» ordeninen mukâfatlandı

04 September 2012

Özbekistan halqları arasında dostluq ve işbirlikke, epsi millet ve toplumlarnıñ dostluğı, qardaşlığı ve özara barışıqlığını pekitüvge qoşqan issesi içün Bütündünya qırımtatarlar kongressi koordinatsion keñeşiniñ azası, Taşkentteki “Avdet” qırımtatar medeniy merkezniñ reisi Nusret Cemilev 2012 senesi avgust 27-de “Dustlik” ordeninen mukâfatlandı

 “Dustlik” ordeni Özbekistan cumhuriyetiniñ eñ yüksek milliy devlet mukâfatlarından biridir. Bu orden devletniñ yolbaşçısı İslam Karimovnıñ teşebbüsi boyunca 1994 senesi mayıs 5-6 künleri Özbekistan cumhuriyetiniñ parlamenti keçirgen sessiyasında teesis etildi.

 “Dustlik” ordeni ile Özbekistan halqları arasında dostluq ve işbirlikke, epsi millet ve toplumlarnıñ dostluğı, qardaşlığı ve özara barışıqlıqnı pekitüv işinde muvafaqiyetlerni elde etken insanlar taqdirleneler. Orden ve ait vesiqa Özbekistan Cumhuriyeti Prezidentiniñ iştirakinde ya da onıñ adından Öliy Majlis Qanunberici palatasınıñ reisi , Öliy Majlis senatı reisi, Özbekistan baş naziri tarafından taqdim etile.

 “Dustlik” ordeninen mukâfatlanğan şahıslarğa minimal aylıq maaşnıñ otuz qat miqdarında bir kerelik para mukâfatı da berile, bunıñ kibi de olar qanunda belgilengen imtiyazlardan da faydalanalar.