Meclis delegatsiyası Avgust añlaşmaları imzalanmasınıñ 32 yıllığına ve

04 September 2012

Avgust 31 – sentâbr 3 künleri Poloniyanıñ Gdansk şeerinde Avgust añlaşmaları imzalanmasınıñ 32 yıllığına ve “Küreşici Göñüldeşlik” meydanğa ketirilmesiniñ 30 yıllığına bağışlanıp ötkerilgen yubiley merasimlerinde halqara resmiy delegatsiyalar, şu cümleden Qırımtatar halqı Meclisiniñ tışqı alâqalar bölüginiñ başı Ali Hamzin yetekçiligindeki delegatsiyası da itştirak etti.

Meclis delegatsiyasınıñ erkânına İnformatsion siyaset ve cemaat teşkilâtlarınen bağlanuv bölüginiñ başı, “Avdet” gazetasınıñ muarriri Şevket Qaybullayev, Meclisniñ Litva Cumhuriyetindeki temsilcisi Adas Yakubausks, “Bizim Qırım” teşkilâtınıñ reisi, Qurultay delegatı Abduraman Egiz ve Poloniyada qırımtatar cemiyetiniñ vekili Nedim Üseinov kirdiler.

31 avgust künü Meclis delegatsiyası “Göñüldeşlik areketiniñ 1981 senesi dekabr ayından soñ Poloniyada arbiy rejim devrinde öldürilgen işçilerine, facialı vaqialarnıñ qurbanlarına abide”ge gülçemberler qoyuvda iştirak etip, şu künü Poloniyadaki semetdeşlerimiznen körüşti ve Gdansk şeerindeki yekâne “Öliva” camisinde cuma namazını qıldılar.

Soñra Emek Havfsızlığı ve gigiyenasınıñ tarihiy zalında Avgust añlaşmaları imzalanmasınıñ 32 yıllığına ve “Küreşici Göñüldeşlik” meydanğa ketirilmesiniñ 30 yıllığına bağışlanğan yubiley merasimi olıp keçti. Onda “Küreşici Göñüldeşlik”niñ qurucısı, kommunistler devrinde muhalifetçi Körnel Moravetskiy, Avropa göñüldeşlik merkeziniñ direktorı Bazil Kerskiy, Milliy hatıra institutınıñ direktorı Lukaş Kaminskiy çıqışta bulundılar. Musafirlerni birinci olıp Göñüldeşlik areketi ülke komissiyası reisiniñ muavini Tadeuş Mayhroviç, leh siyasetçisi, “Göñüldeşlik” areketi liderlerinden biri, kommunistlerden soñki Poloniyanıñ birinci baş naziri Tadéuş Mazovétskiy selâmladılar.

Sentâbr 1 ve 2 künleri tantanalı merasimlerniñ devamı olaraq “Serbestlikke alıp barğan yollar” mevzusında konferentsiya ötkerildi. Konferentsiya iştirakçileri adına Poloniya Prezidenti Bronislav Komorovskiy, Baş nazir Donald Tusk ve belli Litva siyasetçisi, Avropa Parlamentiniñ deputatı Vitautas Landsbergis hayırlav yollağanlar.

Meclis reisi Mustafa Cemilevniñ leh tilinde yazılğan selâmını konferentsiya iştirakçileri gürdeli elçırpamalarnen qarşıladılar. Devlet mukâfatlarına taqdim etilgen bir sıra demokratik areketlerniñ faallerine Poloniya Prezidenti Bronislav Komorovskiyniñ adından mukâfatlarnı onıñ yardımcısı Yan Litınskiy berdi.
Bundan da ğayrı çetel celegatsiyaları, dissident ve öz devletlerinde demokratiya içün küreşken insanlarnıñ çıqışları diñlenildi.

Qırımtatar halqı Meclisini temsil etken Ali Hamzin öz çıqışında 2013 senesi Gdansk şeerinde SSSRde uquqkoruv areketi vekilleri ve dissidentleriniñ iştirakinde halqara kongress keçirmekni teklif etti.

Poloniya ve qırımtatar cemaat teşkilâtlarınıñ özara işbirligine yüksek qıymet kesken Şevket Qaybullayev olarnı öz faaliyetlerini daa da küçlendirmege çağırdı. Qırımtatar gençleri adından Abduraman Egiz çıqışta bulundı.

Poloniya ziyareti devamında Meclis delegatsiyası leh uquqqoruyıcıları, siyasetçileri Lagle Parek, Trivimi Velliste ve Estoniyalı Valeriy Kalabugin, gürcistanlı siyasetçiler Tarel Gviniaşvili, Vahtang Dzabiradze ve Guram Soselia, litvalı cemaat erbapları Saulius Peçeliunas ve Leonardas Vilkas ile körüşip, umumiy vaziyetke dair meselelerni muzakere ettiler.

Öz halqınıñ aqları içün qansız küreş alıp barğan qırımtatar halqı milliy areketine Körnel Moravetskiy yüksek qıymet kesti ve Poloniya Göñüldeşlikniñ tarihını aks ettirgen “Dünyanı yahşılaştırmaq ümütinen” serlevalı kitapnı müellifi olaraq Meclis reisi içün imzaladı. “Kürkeşici Göñüldeşlikniñ lideri ne hıtap etken Ali Hamzin onı Qırımğa kendisi içün oñaytlı bir vaqıtta kelmege davet etti.