Qarasubazarda «Sevinç» balalar bağçası açıldı

03 September 2012

Sentâbr 1 künü Qarasubazarda eki qırımtatar ve eki ukrain tilli gruppalardan ibaret №1 “Sevinç” balalar bağçası açıldı.

“Sevinç” balalar bağçasınıñ tantanalı açılışında Qarasuvbazar şeer yolbaşçısı Albert Kangiyev, Qırım Yuqarı Şurasınıñ deputatı, Meclis reisiniñ birinci muavini Refat Çubarov, Qırım Yuqarı Şurasınıñ deputatı, “Maarifçi” qırımtatar tasil hadimleri birleşmesiniñ reisi Safure Kacametova, Qarasuvbazar rayon devlet memuriyetiniñ reisi Öleg Rusetskiy, regional meclis reisi Mustafa Asaba, musulman cemiyetiniñ başı İlimdar Abdureşitov, Bekir Çoban-zade vaqufınıñ qurucısı Resul Velilâyev, “Taygan” safari-parkınıñ müdiri Öleg Zubkov, Qarasubazar cemaatçılığı, ana-babalar, balalar ve digerleri iştirak ettiler.

S. Kacametovanıñ aytqanına köre, 9 yıl evelsi yani 2003 senesi yazda Qarasuvbazar şeer şurası ana-babalar ve cemaatçılıqnıñ narazılığına baqmadan şeerniñ Bekir Çoban-zade soqağında yerleşken 4-nci qırımtatar mektebini qapatqan edi. Aqsız bu areketini memuriyet şeerniñ sıñırında mektepniñ yañı binası işke tüşürilecek, dep añlattı ve bir yıldan mektepniñ şu eski binasında qırımtatar balalar bağçası açılacağını vade etken edi. Lâkin bağça şeer bücetinde para olmağanı sebebinden açılmadı.

Ana-babalarnıñ defalarca muracaatlarından soñ rayon akimiyeti eger tamir ve restavratsiya işlerine qırımtatarlarnıñ kendileri para tapsalar, balalar bağçasını açmağa söz berdiler. Milliy Meclis ve “Maarifçi” birleşmesiniñ teşebbüsinen eski qırımtatar mektep binasını balalar bağçası içün keliştirilip restavratsiya yapuv leyhası işlendi. Mektep binasını balalar bağçası içün tolusınen restavratsiya yapuv ve bağçanı zarur eşyalar ve oquv qullanmalarınen donatmaq boyunca bütün masraflarnı TİKA qarşıladı

2009 senesi TİKA işlerni tamamladı. Leyha resmiy sürette taqdim etildi, amma balalar bağçasınıñ açılmasına şeer şurası aradan üç yıl keçken soñ tap 2012 senesi sentâbr 1 arfesinde ve bağça statusını deñiştirgeni alda izin berdi.

Rayon devlet memuriyetiniñ reisi (Qarasuvbazar rayonında “Regionlar partiyası”nıñ başı) Öleg Rusetskiyniñ şahsiy kösterişine binaen qanunğa zıt qarar alındı. Yani qarar ana tilinde oqutılğan müessiselerniñ nizamnamesi ve normativ vesiqalar bozulğanı aqibetinde qırımtatar balaçıqlarınıñ yarısından çoqu çoqtan beklenilgen bağçağa barıp olamadılar.

Bundan da ğayrı “Sevinç” balalar bağçasınıñ açılışına “Regionlar partiyası”nıñ vekilleri ellerinde bayraqlarnen sıra-sıra tizilip keldiler. Şu künü “Regionlar partiyası” Qırımnıñ bütün oquv müessiselerinde teşviqat alıp bardılar, albuki Ukrainanıñ “Ukraina halq deputatlarını saylav aqqında” qanunnıñ 74-nci maddesi (2-nci qısmı) boyunca oquv müessiselerinde saylavaldı teşviqat yasaqtır. Amma buña baqmadan “Regionlar partiyası” mektep tantanalarında bayraqlar, partiya simvolikasınen iştirak etip, talebelerge Regionlar partiyasınıñ belgileri olğan kündelik ve çantalarnı ediye ettiler.

“Sevinç” balalar bağçasınıñ bayramından regioncılar tek Meclis reisiniñ birinci muavini Refat Çubarov talap etken soñ kettiler.

Qırımtatar halqı tasiliniñ ğayrıdan tiklenmesinen bağlı meselelerniñ çeziminde devletke yardım etmek maqsadınen Meclis tasilge yatırımlarnı celp etüv yollarını araştıra. Lâkin bu yolda olmaycaq problemler yapıla, davalı vaziyet meydanğa ketirile ve neticede qolay çezilebilecek meseleler yıllarnen çezilmey.