Meclis reisi 10-ncı Halqara türk dünyası sotsial ilimler kongressi iştirakçilerini işni muvafaqiyetli yekünlegenlerinen hayırladı

30 August 2012

10-ncı Halqara türk dünyası sotsial ilimler kongressi ilk defa Qırımda ötkerildi. Bundan evel kongress Türkiye, Azerbaycan, Turkmenistan, Qazahistan ve diger devletlerde keçirilgen edi.

Qırım müendislik-pedagogika universiteti avgust 29-31 künleri 200-den ziyaden insannı 10-ncı Halqara türk dünyası sotsial ilimler kongressiniñ iştirakçileri olaraq qabul ete. Qırımğa Amerika, Azerbaycan, Türkiye, Qazahistan ve Ukrainadan kelgen türkşınas alimler saalar boyunca oturımlarda medeniyet, tarih, sotsiologiya, filologiya meselelerini muzakere ettiler.

10-ncı Halqara türk dünyası sotsial ilimler kongressi türk dünyasınıñ atası İsmail Gaspralınıñ “Tilde, fikirde ve işte birlik” şiarı altında keçirildi. Qırımğa Amerika, Azerbaycan, Türkiye, Qazahistan ve Ukraina universitetlerinden kelgen nufuzlı professorlar ve alimler seslendirgen fikirler 10-ncı Halqara türk dünyası sotsial ilimler kongressiniñ qararında qayd etildi.

10-ncı Halqara türk dünyası sotsial ilimler kongressiniñ tantanalı qapalışında çıqışta bulunğan Qırımtatar halqı Meclisiniñ reisi, Ukraina halq deputatı Mustafa Cemilev kongress iştirakçilerini qoyulğan maqsadğa irişkenleri ve işni muvafaqiyetli yekünlegenlerinen hayırladı.

“Türk dünyasında emiyeti büyük böyle ciddiy tedbirni Qırımda keçirmek qararını alğanıñız içün teşekkür bildiremiz, – dedi Mustafa Cemilev. – Bu kibi ilmiy-ameliy konferentsiya türk dünyası halqlarını raatsızlağan müim meseleler boyunca fikir, tecribe ve bilgi paylaşmaq imkânını bergen fursattır”.

Meclis reisi qayd etkenine köre, Kongress iştirakçileriniñ mevzusı qırımtatar halqınıñ taqdirine ait problemlerni de aks etken maruzaları alimlerniñ yüksek professionalliginden delâlet bere.

Mustafa Cemilev Qırım cemiyeti böyle konferentsiyalarğa muhtac olğanını bildirip, Qırımtatar halqınıñ Meclisi milliy tasil sistemini inkişaf ettirüv ve pekitüvni öz faaliyetiniñ esas yönelişi, dep saya dedi.

Tantanalı qısım çerçivesinde Türkiyeniñ “Sakarya Üniversitesi”rektorı Muzaffer Yılmaz adından Meclis reisi Mustafa Cemilev ve Qırım müendislik-pedagogika universitetiniñ rektorı Fevzi Yaqubovğa teşekkürname ve hatire ediyeleri taqdim etildi.

Kongressniñ qapaluv qısmını Qırım müendislik-pedagogika universitetiniñ, “Uçansuv” ansambli ve genç sanatçılarnıñ istidatlı çıqışları yaraştırdı.