Poloniya Ekinci cian cenki müzeyiniñ hadimleri Meclisni ziyaret ettiler

30 August 2012

Qırımtatar halqnıñ Meclisini Poloniya (Gdansk ş.) Ekinci cian cenki müzeyiniñ hadimleri – professor, baş mütehassıs Rafal Vnuk ve mütehassıs Agata Abramoviç ziyaret ettiler.

2012 senesi avgust 28-de olıp keçken körüşüvde Qırımtatar halqnıñ Meclisini Qırımtatar halqı genotsidini ögrenüv ve aqibetlerini yoq etüv boyunca Qurultay mahsus komissiyası reisiniñ muavini Elvedin Çubarov ve şu komissiya azası, “Avdet” gazetasınıñ muarriri, Meclis Prezidiumınıñ azası Şevket Qaybullayev temsil ettiler.

Poloniyalı musafirler devlet yardımında meydanğa ketirilgen ve açılması 2014 senesine qararlaştırılğan Ekinci cian cenki müzeyini taqdim ettiler.

Professor Rafal Vnuk bildirgenine köre müzey memlekette eñ büyük müzey olıp, Ekinci cian cenkiniñ tarihını adiy adamlarnıñ közünen kösterecek. Sovetler Birliginiñ kommunist rejimi tarafından ekinci cian cenki vaqtındaki sürgünlikler aqqında ikâye müzey ekspozitsiyasınıñ müim qısmı olacaq.

Ekspozitsiyanıñ Qırımtatar halqınıñ 1944 senesi sürgünligine bağışlanğan . qısmında müzey Qırımdan çıqarılıp, Orta Asiya cumhuriyetlerinde ve Rusiyeniñ şimaliy vilâyetlerinde şiddetli komendant rejimi astında yaşamaq zoruna qalğan insanlarnıñ fotoresimlerini köstermege istey.

Bu munasebetnen müzey qırımtatar halqınıñ vekâletli organı ve onıñ mahsus komissiyasınen ortaqlıqta çalışmaq niyetinde ki, bu işbirlik qırımtatar halqınıñ tarihındaki facialı devir olduqça tolu ifade etilir.

E.Çubarov ve Ş.Qaybullayev musafirlerge mahsus komissiyanıñ teşebbüsinen 2009 senesinden berli keçirilgen “Unutma!” aktsiyası çerçivesinde sürgünlik şaatlarınıñ ikâyeleri toplanğanı, bu aktsiya neticelerinden biri qırımtatar halqı sürgünligi aqqında vesiqalı fondınıñ meydanğa ketirilgeni aqqında ikâye ettiler.

Müzey ve Qurultaynıñ Mahsus komissiyası arasında işbirlikte birinci adım olaraq mahsus komissiya azaları Müzeyniñ vekili professor Rafal Vnukke qırımtatarlarnıñ sürgünlik yerlerindeki ömürini aks ettirgen bir sıra resimler berildi.