Qirimtatarlar ve Şimaliy Qibriz Türkiye Cumhuriyeti arasinda bağlarni pekitmeli

29 August 2012

ŞQTCde ziyaretnen bulunğan Qırımtatar halqı Meclisiniñ Başqanı, Ukraina halq deputatı Mustafa Cemil Qırımoğlu Maliye naziri Ersin Tatar tarafından kabul etildi.

E. Tatar mustaqillik mucadelesinde eki halqnıñ taqdirleri biri-birine beñzegenini qayd eterek: “sizler Qırım Cumhuriyetinde Tatarlarnıñ mustaqilligi içün küreş alıp barasıñız. Aqiqiy qaramanlar kibi öz areketiñizni quvetlendirmek içün daa ziyade ğayret köstermektesiñiz.

Biz de aynı areketlerni yapamız. ŞQTC. Qurdıq ve Qıbrız türk halqı olaraq bu yerlerni inkişaf ettirmek, çeçeklendirmek kerekmiz ve dünyanıñ bizge qoyğan embargo, aqsızlığı, çeşit manialarnı aşmaq içün ğayret etemiz”, – dedi.

Asil Nadirniñ yaqalanmasına dair Maliye naziri Tatar iqtisadiyat komandanı olğan Nadirniñ ayaqlarını zıncırladılar, dedi. Rum akimleri Şimaliy Qıbrız Türkiye cumhuriyetine yatırımlar yapqanı içün Asil Nadirni batırmaq istegenlerini tenqid etken E. Tatar rumlar Asil Nadirni batırmaq içün sermiyalar ayırğanı mahkeme vesiqalarında da olğanına diqqat çekti.

E. Tatar mustaqillik areketi mevzusını devam ettirerek: “bu devletni yaşatmaq, quvetlendirmek – bizim eñ müim vazifemizdir. İqtisadiy añlamda vaqtı-vaqtınen bazı fedakârlıq da lâzim. Halqqa bunı añlatmaq kerek. Çünki devletniñ sağlamlığı devletniñ küçüdir”, dedi.

Qırımtatarlarnen dialog ve munasebetlerni devam ettirüvniñ emiyetine diqqatnı celp etken E. Tatar Qıbrızda oquğan talebeler aynı zamanda Qıbrıznıñ da fahriy temsilcileri olğanını söyledi.

Qırımtatar halqı Meclisiniñ başı, Ukraina halq deputatı Mustafa Cemil Qırımoğlu da eki ülke arasında angi alanlarda işbirligi yapılabilecegi boyunca çalıştıqlarını belirtti.

Qırımoğlu, “biz yalıñız dost, qardaş degilmiz. İşbirligimiz ne qadar qaviy olsa, yaqınlığımız da o qadar olur. Bu yerde 15 nefer balamız oquy. Olarnıñ sayısını arttırmaq ve siziñ de yaşlarıñıznı Qırımda körmege isteymiz”, dedi.

Tamırları qırımtatarlarından olğan Ersin Tatarnıñ ŞQTC Nazir oluvını ğurur ile tilge alğan Qırımoğlu Tatarnı Qırımğa davet etti.

Qırımtatar iş adamlarınıñ Şimaliy Qıbrız Türkiye Cumhuriyetiniñ iş dairelerinen işbirligini pekitmek ve inkişaf ettirmek içün oñaytlı şaraitler yaratuv meselelerini Meclis reisiniñ yardımcısı, Qırım Halqara Biznes Birleşmesiniñ yatırımlar ve halqara ticaret komitetiniñ başı Rustem Ümerov seslendirdi.

Mustafa Cemilev Ersin Tatarnıñ ecdatları da Qırımdan olğanı, onıñ babası Rustem Tatar qırımtatar halqınıñ tarihı ve facialı taqdiri aqqında çoq bilgeniini sayğı ve ğurur ile qayd eterek nazirni ve ailesini eñ yaqın zamanda Qırım ziyaretine davet etti.