Mustafa Cemilev Yaqın Şarq universitetiniñ rektorı Suat Günsel ile körüşti

28 August 2012

2012 senesi avgust 28 künü Şimaliy Qıbrız Türkiye Cumhuriyetinde resmiy ziyaretnen bulunğan Qırımtatar halqı Meclisiniñ reisi, Ukraina halq deputatı Mustafa Cemilev Qıbrızdaki Yaqın Şarq universitetiniñ rektorı professor Suat Günselnen körüşti.

Qonuşma devamında Mustafa Cemilev ve Suat Günsel tasil saasında eki taraflı alâqalarnı daa da kenişletmek ve pekitmek maqsadında faal iş alıp barılacağını qayd ettiler.

Cenap Günsel Qırımdan oqumağa kelgen ve öz cumhuriyetlerini eñ yahşı şekilde temsil etken üç qırımtatar studentniñ oquvından memnün olğanını bildirdi. Körüşüvde Meclis reisiniñ yardımcısı, Qırım Halqara biznes birleşmesi Yatırımlar ve halqara ticaret komitetiniñ başı Rustem Ümerov de iştirak etti.

Belli ki, Meclis reisi Mustafa Cemilev ve Qıbrız Yaqın Şarq universitetiniñ rektorı, professor Sual Günsel 2009 senesi avgust 15-te Şimaliy Qıbrız Türkiye Cumhuriyeti ve Ukraina arasında türk-ukrain alış-veriş munasebetleri, iqtisadiyat, tehnika, ilim ve medeniyet saalarında uzun müddetli eki taraflı işbirlik çerçivesinde añlaşmanı imzalağan ediler.

Yaqın şarq universitetiniñ iqtisadiyat ve sotsial ilimler fakultetinde tasil almaq içün er yılı Qırımdan üç nefer genç yollanıla.