Meclis reisi Mustafa Cemilev “Bayrak Haber” televizion kanalanınıñ Aqşamğa doğru programmasınıñ musafiri oldı

28 August 2012

Şimaliy Qıbrız Türkiye Cumhuriyetinde resmiy ziyaretnen bulunğan Meclis reisi, Ukraina halq deputatı Mustafa Cemilev “Bayrak Radio Television Corporation” korporatsiyasınıñ daveti ile 2012 senesi avgust 28 künü “Bayrak Haber” televizion kanalanınıñ Aqşamğa doğru programmasınıñ musafiri oldı.

40 daqqalıq subet devamında Meclis yolbaşçısı 1944 senesi öz yurtundan sürgün etilgen qırımtatar halqınıñ tarihı, çoqyıllıq milliy küreşi ve Vatanğa avdetniñ meşaqatları aqqında ikâye etti.

Mustafa Cemilev qırımtatarlar bugünde-bugün Qırımda azlıqnı teşkil etkenlerini qayd etip, halqnıñ bugünki vaziyetine dair malümat berdi. “Öz mustaqilliklerini elde etken Qıbrızdaki türkler bu esnada şanslılar”, dedi Meclis reisi ve qırımtatar halqı ve Şimaliy Qıbrız Türkiye Cumhuriyetinen dostane munasebetlerni devam ettirmek meselesine ayrıca emiyet berdi .

Bundan da ğayrı Mustafa Cemilev öz cevaplarında Qırım Halqara biznes birleşmesinen beraber qırımtatar iş adamlarınıñ Qıbrızğa tanışmaq maqsadınen ziyaretini teşkilâtlandırmaq teklifinde bulundı.