Mustafa Cemilev Şimaliy Qıbrız Türkiye Cumhuriyetiniñ qurucısı ve birinci prezidenti Rauf Denktaşnıñ qabirini ziyaret etti

28 August 2012

Şimaliy Qıbrız Türkiye Cumhuriyetinde iş ziyaretinen bulunğan Qırımtatar halqı Meclisiniñ reisi, Ukraina halq deputatı Mustafa Cemilev 2012 senesi avgust 27 künü Şimaliy Qıbrız Türkiye Cumhuriyetiniñ qurucısı ve birinci prezidenti Rauf Denktaşnıñ qabirini ziyaret etti.

Belli ki, meşur devlet ve içtimaiy-siyaset erbabı Rauf Denktaş 2012 senesi yanvar 13 künü 88 yaşında vefat etti.

Rauf Denktaşnıñ 2012 senesi yanvar 17-de Lefkoşa şeerinde devlet seviyesinde qılınğan cenaze merasiminde Meclis reisi Mustafa Cemilev de iştirak etken edi.

Qırımtatar halqı Meclisiniñ adından Mustafa Cemilev öz yardımcısı, Qırım Halqara biznes birleşmesi(CIBA) yatırımlar ve halqara ticaret boyunca komitet reisi Rustem Ümerovnen birlikte Rauf Denktaşnıñ qabirine gülçember qoydılar ve öz halqınıñ aqları içün küreşken merhumnıñ ruhuna dua oqudılar.

Şimaliy Qıbrız Türkiye Cumhuriyetiniñ qurucısı ve birinci prezidenti Rauf Denktaş Lefkoşa şeeriniñ mezarlığında defn etildi.