Qırımtatarlar Pötr Simonenkonı çürük yımırta ve «faşist» sözlerinen qarşıladılar

23 Avgust 2012

2012 senesi avgust 22 künü Aqmescitniñ merkeziy meydanında UKP lideri Pötr Simonenko Qırımdaki saylavcılarnen körüşüv keçirdi.

Şaatlarnıñ bildirgenine köre Ukraina kommunist partiyası ve onıñ liderine qoltutmaq içün toplanğan iştirakçilerni maddiy desteklegenler. Lâkin buña baqmadan, Pötr Simonenkonen körüşmege ancaq 300 yaqın, o da esasen qart ve bayraq taşımaq içün kiralanğan yaşlar kelgen.

Mitingge Pötr Simonenkonıñ 2012 senesi mayıs 16-da Ukraina Yuqarı Şurasınıñ minberinden qırımtatar halqını aqaret etken çıqışına açuvlanğan qırımtatarlar da narazılıq bildirmek içün keldiler. Belli ki, o çıqışında Simonenko 1944 senesi mayıs 18-de qırımtatarlarnı aqlı sürette sürgün ettiler, dedi. Qırımtatarlarnıñ qollarında milliy bayraqlar ve “Ukrainada faşizmge – yol yoq!”, “Pötr Simonenko mahkeme etilsin!”, “Simonenko Qırımdan def ol!” kibi şiarlar da bar edi.

Ukraina “baş kommunisti”niñ bir saatlik çıqışı devamında qırımtatarlar “Ukrainada faşizmge – yol yoq!”, “Pötr Simonenko mahkeme etilsin!”, “Simonenko Qırımdan def ol!” dep qıçırdılar ve sanağa çürük yımırtalarnı attılar.

Tedbir bitken soñ Pötr Simonenko “Mashara!” qıçıruvları ve İçki işler nazirligi küçleriniñ qoruvında meydannı terk etti.

Qırımtatar halqı Meclisi reisiniñ birinci muavini Refat Çubarov adiseni böyle izaatladı: “Er angi medeniyetli devlette soyqırımnı, kimge nisbeten yapılğanından qatiy nazar, aqlağan siyasetçi minberden tüşkeni daqqasından siyasetçi olaraq bitken olurdı. Ukraina, Qırımnıñ faciası şunda ki kütleviy, qırımtatarlar, ukrain ya da yeudilerge nisbeten – umumen, kimge olsa-olsun, zulumnı aqlı dep sayğan maneviy bozuq Ukraina halq deputatı statusından qullanğanı alda İçki işler nazirliginiñ imayesinde memleket boylap dolanaraq, yapılğan cinayetlerni aqlamağa, keçken nesillerniñ çekken azaplarını unutmağa tırışqan insanlar ögünde çıqışta buluna”.

Aktsiyanıñ soñunda Refat Çubarov meydanğa kelgen qırımtatarlarğa Simonenko kibi siyasetçilerni qabul etmegenlerini köstermege kelgenleri içün teşekkür bildirdi. Aynı zamanda Refat Çubarov narazılıq bildirgenler arasında başqa millet vekilleriniñ az olğanını qayd etip, “eminmiz ki, yarın-o bir kün olarnıñ közleri açılır ve Simonenko kibi maneviy bozuqlar içün ukrain siyasetine yol ebediyen qapalır”, dep qoştı.