Refat Çubarov: Meydanğa kel de, faşist kibi areket etken siyasetçilerge özüñni ve milletiñni saymağa mecbur et!

22 Avgust 2012

Meclis reisiniñ birinci muavini Refat Çubarov Facebookta öz saifesinde Ukraina kommunist partiyasınıñ lideri Pötr Simonenkonıñ sözleri kimge toqunğan olsa meydanğa kelip oña öz munasebetini köstermege çağırdı.

“Bugün – avgust 22-de Aqmescitniñ merkeziy meydanında kommunist partiyasınıñ yetekçisi Pötr Simonenko Qırımdaki saylavcılarınen körüşecek. Mezkür körüşüv saylavaldı azırlıqnen belgilengeni añlaşıla ebet. Simonenko kelecek parlament saylavlarında Qırım sakinleriniñ reylerini qazanmaqnı planlaştıra. Eminim ki, menim yazdıqlarımnı oquğanlarnıñ çoqusı Pötr Simonenkonıñ Ukraina Yuqarı Şurası minberinden mayıs ayında yapqan çıqışından şok yaşağandırlar. O zaman Simonenkonıñ söyledigi şu sözler: “qırımtatarlarnı qurtarmaq içün olarnı Qırımdan çıqardılar…”, “sürgün etilgen yerlerinden olar tasil aldılar, akademikler olıp, qocaman işhanelerniñ yolbaşçıları oldılar. Demek, bu aktsiya qırımtatar halqını qurtarmaq içün yapılğan edi” bir çoq qırımtatarlarğa tesir etkendir.

Kim de kim Pötr Simonenkonıñ sözleri onı aqaret etti, dep sayğanlar, sürgünlikniñ birinci yıllarında elâk olğan biñlernen soy-aqrabalarınıñ, günahsız insanlarnıñ ruhu içün accı çekkenler, Pötr Simonenkonıñ insanlıqqa zıt çıqışları içün esabını berecekler, şeref ve namusını qorçalamağa istegenlerniñ episi bugün meydanğa kelip, Simonenkonıñ çıqışlarına öz munasebetini köstermek kerekler.

 “Biz avgust 22 künü saat 17.00-de Aqmescitniñ merkeziy meydanında toplanamız. Bizim yerimiz – Kirov soqağı tarafından kirişteki meydançıqta yani Ukrain teatri ve eykel arasındadır”, – dep yaza Refat Çubarov.

Çubarovnıñ aytqanına köre toplaşuv söz ve davasız toplaşuvlar aqqını amelge keçirüv çerçivesinde yapılıp, kelgenler Ukrainada stalincilikniñ qayta tiklenmesine qarşı fikirini ifade etecekler.

“Bizim areketlerimiz – barışıq ve zorbalıqsız usullarnen Pötr Simonenkonı milletlara munasebetlerniñ bozulmasına sebepçi olabilecek çıqışları içün afu soramağa mecbur etmektir”, – dep qayd ete Facebookta Çubarov.

Meydanğa kel de, faşistlerce davranğan siyasetçilerni kendiñni ve öz milletiñni ürmet etmege mecbur et!

Hatırlatamız ki, mayıs 16 künü Ukraina Yuqarı Şurası “Milliy mensüpligine köre sürgün etilgen şahıslarnıñ aqlarını ğayrıdan tiklev aqqında” Qanun leyhası içün rey berilgende müsbet qarar alıp olamadı. Ukraina kommunist partiyası deputatları rey berüvde iştirak etmediler. Amma bundan evel fraktsiya yetekçisi Pötr Simonenko qırımtatar halqınıñ sürgünligini açıqtan-açıq aqladı