«Alraid» Ramazan bayramınıñ üçünci künü Qırımda küreş boyunca cumhuriyet yarışı keçirdi

21 August 2012

2012 senesi 21 avgust künü Aqmescitte “Alraid” birleşmesi ve Qırımtatar milliy küreş federatsiyası Oraza bayramı şerefine küreş boyunca cumhuriyet yarışını keçirdi.

Yarışqa teşrif buyurğan Meclis reisiniñ birinci muavini Refat Çubarov, Qırım Tasil nazirligi sport ve beden terbiyesi idaresiniñ başı Vitaliy Romanov, Bütünukrain cemaat teşkilâtlarınıñ birleşmesi “Alraid” Qırım bölüginiñ başı Ali Muhammed Taha, Meclis tışqı alâqalar bölüginiñ başı Ali Hamzin küreşçilerge muvafaqiyet tilediler.

“Ürmetli sportçılar, sayğılı musafirler! Er yılı Oraza bayramında küreş boyunca cumhuriyet miqyasında yarış keçirmek endi yahşı bir ananege çevirildi, – dedi öz çıqışında Refat Çubarov. – “Alraid” birleşmesi ve Qırımtatar milliy küreş federatsiyası yahşı ananege temel qoydılar, oña artıq er kes alıştı. Eminim ki, bu yarışlarnıñ kelecegi daa ziyade keniş olur”.

Meclis reisiniñ birinci muavini şunı da qayd etti ki, insanlar nasıldır tedbirge toplansalar, küreş daima şu tedbirniñ ayırılmaz bir qısmı ola.

“Meclis adından, Bütündünya qırımtatarlar kongressi adından yarış iştirakçilerini hayırlamaq, yarışnı teşkilâtlandırğan “Alraid” ve Qırım milliy küreş federatsiyasını ise taqdirlemek ister edim. Böyle zarur ve müim tedbir pek kerektir. Ebet, er biriñiz yeñmekni tüşünesiñiz. Amma angi yer qazanğanıñızdan qatiy nazar biz sizlerni ürmet etemiz. Biz tek birlik olğanımızda yeñebilirmiz, çünki Qırımnıñ menfaatını tüşünemiz, – dep selâmları yarış iştirakçilerini Refat Çubarov.

Vitaliy Romanov ise Ukraina Olimpiya oyunları komiteti Qırım bölüginiñ başı Yevgeniy Mihaylin “Alraid” birlişmesiniñ ve Ali Muhammad Tahanıñ işini taqdirlegenini ayttı.

Romanov öz nevbetinde bütün musulmanlarnı bayramnen hayırlap, olarğa eyilikler, küreşçilerge ise ğalebeler tiledi