Saudiya Arabistanı Vaquflar ve din işleri boyunca nazirlikniñ hadimi Mahmud Addossari Mejlis reisi Mustafa Cemilevni İd al-fitr ile hayırladı

19 Avgust 2012

Saudiya Arabistanı Qırallığı Vaquflar ve din işleri boyunca nazirlikniñ hadimi Mahmud Addossari ve Bütünukrain “Alraid” cemaat teşkilâtlarınıñ birleşmesi Qırım bölüginiñ reisi doktor Ali Mohamad Taha avgust 19 künü oraza ayı soñuna kelgeni ve İslâmnıñ eki büyük bayramlarından biri olğan ve bütün dünya musulmanları avgust 19,20 ve 21 künleri qayd etken Oraza bayramı munasebetinen Mejlis reisi Mustafa Cemilevni hayırladı.

Mahmud Addossariniñ bildirgenine köre qırımtatar halqınıñ liderinen musulmanlar içün büyük bayramnıñ ilk kününde körüşmek onıñ içün büyük şereftir.

Saudiya Arabistanı Vaquflar ve din işleri boyunca nazirlikniñ hadimi Mahmud Addossari qırımtatar halqına Allahtan rahmet ve bereket, tarihiy Vatanında birlik ve çeçeklenüv tiledi.

Ramazan ayı devamında cenap Addosari Bütünukrain “Alraid” cemaat teşkilâtlarınıñ birleşmesiniñ merkeziy ofisi yerleşken Kiyev İslâm Cemaat Merkezinde bulunıp, Quran oqumağa ögretüv boyunca kurslar alıp bardı.

Mustafa Cemilev Qırımtatar halqı Meclisiniñ adından musafirlerni Oraza bayramınen hayırlap, musulman halqlarınıñ ileride de birligi ve dostluğına eminlik bildirerek Bütünukrain “Alraid” cemaat teşkilâtlarınıñ birleşmesi Qırım bölüginiñ reisi doktor Ali Mohamad Tahağa qırımtatar halqı milliy-medeniy ananeleriniñ inkişafına qoltutqanı içün Milliy Meclisniñ Şeref yarlığını taqdim etti.

Hatırlatamız ki, avgust 19 künü saba Qırımnıñ bütün camilerinde, bunıñ kibi de Ukraina boylap İslâm medeniy merkezlerniñ camilerinde bayram namazları qılındı.