Cümleñizge Ramazan bayramı hayırlı olsun!

19 Avgust 2012

Milliy ruhumız, imanımız pekinsin!

Mühterem musulmanlar!
Ürmetli vatandaşlar!

Cümleñizge Ramazan bayramı hayırlı olsun!

Şanlı ecdatlarımızdan eñ qıymetli miras olıp kelgen ve yaşağan muqaddes din, özgün urf-adetlerimizni kütken sayın, halqımıznıñ arasında birlik-beraberlik pekingenine, milliy maqsatlarımızğa yetmek iradesi qaviyleşkenine, o, daa da ziyade iqtidarlı, sabırlı, terbiyeli, ferasetli olmasına şek-şübe yoq.

Bu faziletler üküm sürgen yerde muvafaqiyet de elde etilir, epimizniñ arzumız olğan devletçiligimiz tiklenmesi, biz millet olaraq çeçeklenmemiz içün şarait da doğup kelir, bizni parlaq kelecek beklegenine eminlik peyda olur.

Oraza künleri olğan temçitler, berilgen iftarlar em beden, em ruhlarımıznı temizledi, imanımız qaviyleşmesine siltem berdi.

Sayğılı dostlar!

Ana-Vatan toprağımızda Alla -Taalâ epiñizni daa çoqtan-çoq bayramlarğa yetkizsin! Bayram er bir musulman qorantasına tınçlıq, barlıq, quvanç bağışlasın, evlâtlarımız bahtlı olsunlar ve baba-dedelerniñ milletpervelik, Allağa daima sığınmaq yolundan ketsinler!

Qırımtatar Milliy Meclisi.