«Men balalarım içün yaşayım ve zorluqlar ögünde egilmege aqqım yoqtır», – dey Zalina Üseinova

18 August 2012

Oraza Bayram arfesinde 2012 senesi avgust 18 künü Meclis reisi, Ukraina halq deputatı Mustafa Cemilev Saq rayonınıñ Suvorovskoye köyünde yaşağan üç egiz balalar – Edem, Safiye ve Leniyeniñ anası 30 yaşlı Zalina Üseinovanıñ ailesini ziyaret etti.

Mustafa Cemilevniñ Zalina Üseinovanı böyle güzel balalarnı doğurğanı, ana-babasınıñ yardımı sayesinde ağır devirni artta qaldırıp, balalarınen beraber evge esen-aman qaytqanınen hayırlavlarına Saq regional meclis reisi Zevcet Qurtümerov, Qurultay Teftiş komissiyasınıñ reisi Qurtseit Abdullayev, Saq rayon şurasınıñ deputatları Eskender Bilâlov ve Dilâver Seithalilov da qoşuldılar.

Musafirler boş qollarınen kelmediler. Olar balalarğa ve analarına üç yerli oñaytlı arabaçıq ve daa çoq kerekli şeylerni bağışladılar.

Mustafa Cemilev ve Zevcet Qurtümerov şahsen Safiye ve Leniye qızçıqlar içün Quran ketirdiler.

Balalar 2011 senesi avgust 26 künü yedi aylıq olıp doğdılar. Birinci Edem dünya yüzüni kördi, soñra Leniye ve birazdan Safiye doğdı. “Bir qaç künden biz balalarnıñ bir yaşını qayd etecekmiz. Şükürler olsun, balalar sağlam, yahşı öseler”, – dedi balalarnıñ bitası Zulfira İbraimova.

Zalina Üseinovanıñ kendisi, başına tüşken qıyınlıqlarğa baqmadan özüne kelip başladı. Şimdilik oña yürmek zor ve o, künde pek çoq ilâc içmek zorunda. Lâkin bu cesür qadın Yüce Allağa şükürler aytıp, daima onıñ yanında bulunğan ana-babasına ve ağır künlerde yardım elini uzatqanlarnıñ episine teşekkürler bildire.

“Men balalarım içün yaşayım ve bilem ki, qıyınlıqlar ögünde egilmege aqqım yoqtır” – dedi Zalina musafirlerge. Aynı zamanda Zalina ve onıñ soyları adalet tiklenmesine inanalar. Doğumdan soñ ekimlerniñ diqqatsızlığı neticesinde 4 litr qan coyğanı aqibetinde felçke oğradı ve eki ay reanimatsiyada yattı. Buña sebepçi olğanlarnıñ episi cevapqa çekilmeliler.

Meclis reisi Mustafa Cemilev Zalina Üseinova, onıñ balaları ve merhametli ana-babasına sağlıq, baht ve küç-quvet tiledi. “Bizim borcumız sağlam ve bahtlı evlât östürmek, zorluqlarnı yeñmektir”.

Musafirler aileni keleyatqan Oraza bayram ile hayırladılar.