Refat Çubarov Qırım Yuqarı Şurasında qırımtatar tilinde çıqış yapacaq

15 Avgust 2012

Avgust 15 künü Qırım parlamentinde “Ukrainanıñ “Devlet til siyasetiniñ esasları aqqında” qanunını amelge keçirüv boyunca birinci nevbetteki tedbirler aqqında” qarar muzakere etilgende çıqış yapqan Qırımtatar halqı Meclisi reisiniñ birinci muavini, “Qurultay-Ruh” deputat fraktsiyasınıñ başı Refat Çubarov ileride parlament toplaşuvlarında qırımtatar tilinde qonuşacağını bildirdi, – dep haber ete QHA.

“Kelecek sessiyadan başlap men bu yerde faqat qırımtatar tilinde qonuşacam. Lütfen, nevbetteki sessiyağa qadar deñişmelerni azırlañız qabul eteyik ve qanunnıñ çalışmasını teminleyik” – dep teklif kirsetti Refat Çubarov.

Qarar leyhası boyunca rey berilgen soñ R. Çubarov kene söz alıp: “Kelecek sessiyadan başlap men üç tilde çıqış yapacam. Şunıñ içün qırımtatar tilini ve belki de ukrain tilini añlamağan meslekdeşlerim ve jurnalistler içün tercimanlarnı azırlamañıznı rica etem. Men maña berilgen aqtan faydalanacam”

Hatırlatamız ki, 2012 senesi avgust 15-te Qırım Yuqarı Şurası Qırım Nazirler şurasına oktâbr 10-ğa qadar cumhuriyet parlamentiniñ muzakeresine “Ukrainanıñ “Devlet til siyasetiniñ esasları aqqında” qanunını amelge keçirmek boyunca tekliflerni kirsetmekni avale etti.