Lemmar Yunusov: «Ayder Yaqubovnıñ ölüminde qabaatlılar belgilenip, cezalanmasına tırışırmız»

14 Avgust 2012

“Krımgaz” ortaqlıq teşkilâtınıñ ofisinde özüni yaqqanı neticesinde üç künden soñ elâk olğan 44 yaşlı Ayder Yaqubovnı 2012 senesi avgust 13 künü defn ettiler.

Aqmescit regional meclisniñ reisi Lemmar Yunusovnıñ bildirgenine köre, sağlam ve ailesini qayğırğan insannı böyle yapmağa mecbur etken sebepler belgilenmekte.

“Onıñ yaqınları ve aqrabaları şoktalar, bir qaç künden soñ biz olarnen ve Ayder Yaqubovnıñ arqadaşlarınen bağlanıp, facianıñ sebeplerini ögrenmek maqsadındamız. Aqiqiy sebeplerini bilgenimizden soñ, insannı öz canına suiqast yapmağa mecbur etkenler belgilenip cezalanmalarına tırışırmız”, dedi Lemmar Yunusov.