Ramazan ayı bütün musulmanlarnı birleştire

13 Avgust 2012

Musulmanlar içün muqaddes olğan Ramazan ayı başlanğanınen Qırımnıñ bir çoq yerlerinde Qırımtatar halqınıñ Meclisi ve regional temsilcilikleri, Qırım musulmanları diniy idaresi ve iş adamlarınıñ yardımında iftarlar keçirile.

Qırımnıñ bazı camilerinde, şu cümleden Aqmescitte, Qarasuvbazarda, Eski Qırımda er kün ve “Alraid” Bütünukrain cemaat teşkilâtlarınıñ birliginde aftada üç kere iftar berile.

2012 senesi avgust 11-de Ramazan ayınıñ 23-nci künü Aqmescit şeer şurasınıñ deputatı Seytumer Berberov, Aqmescit şeeri Merkeziy rayon şurasınıñ deputatı Lilâ Müslimova ve Qırım Halqara Iş Adamları Birleşmesiniñ qoltutuvında Aqmescit şeerindeki “Petrovskaya balka” maallesiniñ sakinleri içün iftar ötkerildi.

“Meraba” qavesinde keçirilgen bu iftarda 50 adam iştirak etti. İftarnıñ teşkilâtçıları oraza tutqanlarnıñ episine sabır-taqat, tutqan orazalarınıñ qabul etilmesini tilediler.

Öz nevbetinde “Petrovskaya balka” maallesiniñ qartları İslâm şartlarına boysunmaq – er bir musulmannıñ boyun-borcu olğanını, musulmanlar biri-birine qoltutmaq ve yardımcı olmaq kerekligini qayd ettiler.