«Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında» qanun leyhası ekinci oquv muzakeresine azırlanıla

10 Avgust 2012

Altıncı çağırılış Ukraina Yuqarı Şurasınıñ on birinci sessiyası devamında İnsan, milliy azlıqlarnıñ aqları ve milletlerara munasebetler meseleleri boyunca komitet “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” qanun leyhasını ekinci oquv muzakeresine azırlamaqnı planlaştıra. Bu aqta Ukraina Yuqarı Şurasınıñ resmiy saifesi haber bere.

2012 senesi iyün 20-de Ukraina Yuqarı Şurası tarafından qabul etilgen vesiqağa(№5515) binaen milliy mensüpligi boyunca sürgün etilgen şahıslarnıñ statusını, olarnıñ aqlarını tiklev boyunca devletniñ kefilligi, olarnıñ aqlarını tiklev boyunca devlet siyaseti printsipleri ve devlet akimiyeti, yerli akimiyet organlarınıñ vekâletligini belgilemek teklif etile.

Leyhada mevcut tertipke binaen sürgün etilgen şahıs, dep Ukraina vatandaşlığını qabul etken aşağıdaki insanlar sayıla:

-1941-1944 seneleri milliy mensüpligi sebebinden şimdiki Ukrainanıñ topraqları olğan yerlerde daima yaşap, SSSR devlet organlarınıñ qararı boyunca sürgün etilgen sabıq SSSRniñ vatandaşları olğan qırımtatar halqı, milliy azlıqlarnıñ vekilleri;

– arbiy hızmeti yekünlengen, evakuatsiyadan qaytqan, ceza işlerinden azat etilgen soñ sürgünlik yerlerinde bulunğan aile azalarınıñ yanına zorluqnen yollanılğan sabıq SSSR vatandaşları olğan şahıslar;

– 1941 -1944 seneleri sürgün etilüv vaqtında daimiy yaşağan yerlerinden uzaqta(arbiy hızmette, apshanelerde, emek ordusında) bulunıp, soñundan olarnıñ da milliy mensüpligi sebebinden aqları ve serbestligi sıñırlanğan, şu cümleden evel yaşağan yerine qaytması yasaqlanğan şahıslar (sabıq SSSR vatandaşları)

– daimiy yaşağan yerlerine qaytmazdan evel sürgün etilgen şahıslarnıñ ailesinde doğğan şahıslar

Qanun leyhasında bunıñ kibi de sürgün etilgen şahıs statusını berüvniñ tertibi, Ukrainağa daimiy yaşamaq içün qaytıp kelgen şahıslar ve olarnıñ aile azalarına devlet kefilligini taqdim etüv, sürgünlik vaqtında çekip alınğan mal-mülkü yerine ödeme mehanizmi belgilene.

Vesiqada milliy mensüpligi boyunca sürgün etilgen şahıslarnıñ aqlarını ğayrıdan tiklev saasında icra akimiyeti ve yerli akimiyet organlarınıñ vekâletligini pekitmek teklif etile.

Hatırlatamız ki, 2012 senesi iyün 20-de Ukraina Yuqarı Şurası mezkür qanunnıñ leyhasını esas olaraq birinci oquvda qabul etip, onı ekinci oquvda muzakere etmek içün yolladı.

Müellifi Qırımtatar halqı meclisiniñ reisi, Ukraina halq deputatı Mustafa Cemilev olğan № 5515 Qanun leyhası 2010 senesi cedvelge alındı. Evel parlament qabul etken böyle qanun leyhasına Ukraina prezidenti 2004 senesi veto qoyğan edi.