Aqmescitte belli olmağan şahıslar sürgünlik qurbanlarınıñ abidesini aqaret ettiler

08 Avgust 2012

Aqmescitniñ Salğır bağçasında qırımtatar halqı sürgünliginiñ qurbanlarına qoyulğan abide nevbetteki vandalizm ücümine oğradı.

Bellisiz şahıslar qırımtatarlar sürgün etilgen cumhuriyetlerniñ adları yazılğan taşlarğa, bunıñ kibi de TMU botanika bağçasınıñ qorasına mor boyanen faşistlerniñ ğamalı haçını çızdılar.

“Rusiye” dep yazılğan taşqa toqunılmayıp, şu yerde “Ya Ukraina qayda?” degen sual yazılğan. 

Meclis Kâtibiyetiniñ başı Zair Smedlâyev ve Aqmescit regional meclis azaları adise yüz bergen yerge barıp, oldğan şeyni video ve fotokameralarğa çektiler ve Ukraina İçki işler nazirliginiñ Qırımdaki Baş idaresi Kiyev rayon bölügine haber ettiler. 

“Evelki vandalizm areketleri içün iç kimse cezalanmağanı işte böyle aqibetke ketire, bir ğamalı haç yerine endi qırımtatar halqına dair yerlerde onlarnen böyle belgiler peyda ola”, – dedi Zair Smedlâyev adisege izaat berirken. 

Şunı qayd etmeli ki, mezkür abide Ukraina halq deputatı Rinat Ahmetovnıñ maddiy qoltutuvında tiklengen edi. 

Hatırlatamız ki, iyül 15-ten 16-sına keçer gecesi tıpqı böyle haçnen SSSRniñ Eki defa qaramanı, efsaneviy uçucı Amethan Sultannıñ portreti bozulğan edi. Bir qaç künden soñ bellisiz şahıslar mor boyanen Aqmescitte İsmail Gasprinskiy eykeli yanında çaqıl üstünde milliy bayraq tasvirine de haç çızğan ediler.