Yañı çağırılacaq Qurultayğa delegatlarnı saylavğa azırlıq başlandı

01 Avgust 2012

İyül 29 künü Qırımtatar halqı qurultayına delegatlarnı saylav boyunca merkeziy saylav komissiyasınıñ ekinci toplaşuvı olıp keçti.

Onda “Qırımtatar halqı qurultayı delegatlarını saylavnıñ esas printsipleri aqqında” Qurultay 4-nci sessiyasınıñ qararı esasında “Qırımtatar halqı qurultayına delegatlarnı saylav nizamı”nı işlemek içün iş gruppası meydanğa ketirildi.

Hatırlatamız ki, mezkür qarar ile Qurultay delegatlarını saylav sistemasına emiyetli deñişmeler, birinci nevbette delegatlıqqa namzetlerni doğrudan- doğru rey berüv usulı, kirsetile.

Merkeziy saylav komissiyasınıñ işçi gruppasına Qurultay delegatlarını saylav boyunca nizamnı avgust 10-ğa qadar işlemek, leyhağa qoşumca ya da deñişme kirsetmege istegenlerge ise avgust 5-ke qadar öz tekliflerini yollamaq mümkünligini ilân etmek qararı alındı. Tekliflerni şu elektron adresi boyunca – merkezsaylavkom@gmail.com yollamaq ya da Merkeziy saylav komissiyası azalarına şahsen bermek mümkün.

Malümat. “Qırımtatar halqı qurultayı delegatlarını saylavnıñ esas printsipleri aqqında”ki qarağa binaen Qırımtatar halqınıñ Meclisine Merkeziy saylav komissiyanen birlikte “Qırımtatar halqı qurultayına delegatlarnı saylav nizamı” nı işlep, öniñ içine 5-nci çağırılış qurultaynıñ 4-nci sessiyasında tasdiqlanğan normalarnı kirsetmek ve Meclisniñ toplaşuvında 2012 senesi avgust 20-ge qadar tasdiqlamaq avale etildi.

35 insandan ibaret Merkeziy saylav komissiyası 2012 senesi iyül 22 künü Qırımtatar halqı qurultayınıñ 4-nci sessiyasında meydanğa ketirilip, reisi olaraq Remzi Ablayev saylanğan edi.

Merkeziy saylav komissiyasınıñ şu künü olıp keçken birinci toplaşuvında reisniñ muavini olaraq Eldar Kanatayev, kâtibi olaraq Beyye İlyasova saylandı.