Ahtem Çiygoz: Biz Krımskten balalarnı kerek olğanğa qadar evlerimizge almağa azırmız

31 Iyül 2012

2012 senesi iyül 31 künü Aqmescitte Qırımtatar halqı Mejlisiniñ muavini Ahtem Çiygoz ve Bağçasaray şeer yolbaşçısınıñ muavini Ali Abdullayev Krımskteki adiseler boyunca matbuat konferetsiyasını keçirdiler.

Matbuat konferentsiyanıñ teşkilâtçıları aytqanına köre, Meclis reisiniñ avalesinen iyül 9-10 künleri Meclis vekilleri afat yüz bergen şeerge yol aldılar. Körgenleri olarnı deşetke qoydı.

“Ne sebepten Meclis reisiniñ avalesinen Krımskke bardıq? Çünki Krım rayonında daa Qırımğa qaytmadan evel pek çoq semetdeşimiz yerleşti, – dep başladı öz çıqışını Ahtem Çiygoz. – Şeerde bugün de tarihiy vatanına qaytıp olamağan pek çoq qırımtatarı yaşa. İşte, semetdeşlerimizniñ alından haber almaq, qolumızdan kelgen yardımnı köstermek içün anda kettik”.

Meclis reisiniñ muavini bunıñ kibi de qayd etti ki, Krımskte yüz bergen adiseniñ tam sebeplerini, körülgen zararnıñ aqiqiy kölemini ögrenmek kerek edi. Çünki bu aqta malümat gizlenildi

“Anda kelip, aqiqiy afatnı ve onıñ aqibetlerini öz közlerimiznen kördik. Şeerniñ büyük bir qısmı suv altında, ebet biz kelgende suv pek o qadar çoq degil edi. Körgenlerimiz afatnıñ nasıl olğanını tasavur etmek imkânını berdi. Matbuatta ise sağanaq yağıp, 150-170 qurban oldı, denildi. Albu ki, bu asla da aqiqat degil”, – dedi Ahtem Çiygoz.

Matbuat konferentsiyanıñ teşkilâtçıları qayd etkenlerine köre, suv basımınıñ şaatlarınen subetleşkende, olar iç bir türlü sağanaq olmağanını ayttılar. Zararlanğanlar degenler ki, dalğanıñ yüksekligi 7=8 metrge barıp, insanlar aqıp keteyatqan maşina, buzdolap, terek ve taşlar tübünde qalğanlar.

Matbuat konferentsiyası devamında Ahtem Çiygoz şunı da qayd etti ki, Krımskte bulunğanda olar Qırımtatar halqınıñ Meclisi adından kerek olğanğa qadar balalarnı Qırımdaki ailelerge almaqnı teklif ettiler. “Şeerniñ büyük bir qısmı öyle bir vaziyette ki, onı ğayrıdan tiklemek içün daa pek çoq vaqıt kerek olacaq. Afatta pek çoq ayvan ölgeninden, sıcaq avada yuqunçlı hastalıqlar da çoqlaştı. Biz Meclis ofisinen ve mennen bağlanmaq içün telefon nomerlerni qaldırdıq”, – dedi Çiygoz.

Balalarnı almaq ricası oldımı, degen sualge Ahtem Çiygoz: “Şimdilik böyle rica tüşmedi, amma biz daima azırmız”.

Matbuat konferentsiyanıñ soñunda Ahtem Çiygoz haber etkenine köre, Krımskte bir qırımtatar qadını elâk olğan, bundan başqa malümat onda yoqtır. Umumen, şeerde episi olıp 1 000-den ziyade insan elâk oldı. Bunıñ delili olaraq matbuat konferentsiyanıñ teşkilâtçıları bir yerli sakinniñ: “600 qabir qazıldı, daa qazalar…” degen sözlerini ketirdiler.

Meclis reisiniñ muavini bunıñ kibi de afatnıñ sebepleri boyunca öz fikirinen paylaştı. “Suvnı esalet açqandırlar, – dedi Çiygoz. – Şaatlarnıñ hatırlağanına köre, suv eksilgen soñ balaban-balaban balıqlarnı tutqanlar. Suvnı açqanlar elbette onıñ qayda baracağını yani Krımsk şeerini basacağını bile ediler”.

Hatırlatamız ki, iyülniñ başında Krasnodar ülkesinde tabiiy ve tehnikiy afat yüz bergeni aqibetinde yüzlernen insan elâk olıp, şeer harabege çevrildi. Krımsk şeerinde yaşağan semetdeşlerimiznen bağlanmaq, allarından haber almaq ve yardım etmek maqsadında Meclis reisi Mustafa Cemilevniñ avalesinen Meclis reisiniñ muavini Ahtem Çiygoz reberliginde gruppa Krımskke barıp keldi.