Meclis reisiniñ muavini Remzi İlyasov Qırımlı sportçılarğa Londradaki Olimpiya oyunlarında altın medaller qazanmaqnı tiledi

28 Iyül 2012

“Segodnâ” gazetası keçirgen “LONDRADA BİZİMKİLERİNE QOLTUTAYIQ” aktsiyası çerçivesinde Meclis reisiniñ muavini, Qırım Yuqarı Şurası Milletlerara meseleler ve sürgün etilgen insanlarnıñ işleri boyunca daimiy komissiyasınıñ reisi Remzi İlyasov Londradaki 30-ncı Olimpiya oyunlarında Qırımnı temsil etecek qırımlı sportçılarğa mektüp yolladı.

“Qıymetli sportçılar, sizlerniñ er biriñizge Londrada Olimpiya oyunlarında işleriñiz oñundan kelmesini tileyim. Sizler sportnıñ çeşit saalarını – em yengil ve ağır atletika, boks, küreş, bediiy gimnastikanı taqdim etesiñiz, amma epiñizni sevgili Qırımımıznı temsil etmeñiz birleştire.

Aqılıñızda olsun ki, biz sizlerge qoltutamız, göñlümiznen siz ile berabermiz. Er biriñiz sportta belli bir muvafaqiyetlerni elde ettiñiz, amma eñ büyük qazanç – Olimpiya oyunlarında alınğan altın medallerdir. Siz memleketniñ şerefini qorçalağanıñız ğalebege irişmeñizde küç ve taqat berir”, – denile R. İlyasovnıñ mektübinde.

Hatırlatamız ki, bu sene Londradaki 30-ncı Olimpiya oyunlarında Ukrainanı 245 sportçı temsil etip, olarnıñ arasında qırımlı sportçılar – bokçı Aleksandr Üsik, bediiy gimnast Anna Rizatdinova, Pekin Olimpiya oyunlarınıñ qurşunnen atışma boyunca çempionı Artur Ayvazân, ağır atlet Artem İvanov, mizraq atıcılar Vera Rebrik ve Roman Avramenko, çöküç atıcı Aleksey Sokirskiy, küreşçi Lenur Temirov, qurşunnen atışma boyunca çoq defalı çempion, Darya Tihonova ve 2011 senesi Ukraina kubogınıñ saibi Natalya Yastrebtseva.

Londrada Olimpiada-2012 oyunları iyül 27-de açıldı.

Olimpiada devamında sportnıñ 32 çeşiti boyunca yarışlar olıp, 302 komplekt mukâfat berilecek. Olimpiya oyunlarında dünyanıgñ çeşit ülkelerinden 10,5 biñ sportçı iştirak ete.