Birleşken Muhalifetniñ «Batkivşçina» (Vatan) Bütünukrain Birleşmesi ve Qırımtatar MilliyMeclisi 2012s. parlament saylavlarında iştirak etecekleri aqqında müşterek beyanatnı imzaladılar

27 Iyül 2012

Birleşken Muhalifetniñ “Batkivşçina” (Vatan) Bütünukrain Birleşmesi ve Qırımtatar MilliyMeclisi 2012 senesi parlament saylavlarında iştirak etecekleri ve 7-nci çağırılış Ukraina Yuqarı Şurasında Birleşken muhalifetniñ cedveline Meclis köstergen namzetler vastasınen işbirlik aqqında müşterek beyanatnı imzaladılar.

Bu aqta 2012 senesi iyül 27 künü Kiyevde Birleşken Muhalifetniñ “Batkivşçina” (Vatan) Bütünukrain Birleşmesi keñeşiniñ reisi Arseniy Yatsenük, Qırımtatar halqı Meclisiniñ reisi Mustafa Cemilev ve Birleşken Muhalifetniñ “Batkivşçina” (Vatan) Bütünukrain Birleşmesi Merkeziy saylav komissiyasınıñ başı Aleksandr Turçinovnıñ birlikte keçirilgen matbuat konferentsiyasında ilân etildi

Birleşken Muhalifetniñ “Batkivşçina” (Vatan) Bütünukrain Birleşmesi ve Qırımtatar MilliyMeclisniñ müşterek beyanatı ukrain ve qırımtatar tillerinde imzalandı.

Şunı hatırlatamız ki, birleşken muhalifetke 7 partiya kire: “Batkivşçina” (Vatan) Bütünukrain Birleşmesi, “Front zmіn”(Deñişüvler cebesi), “Narodnıy ruh Ukrainı” (Ukraina halq areketi), “Grajdanskaya pozitsiya” (Vatandaşlıq pozitsiyası), “Za Ukrainu” (Ukraina içün) partiyası, “Reformı i porâdok” (İslâat ve tertip-nizam) partiyası ve “Narodnaya Samooborona” (Halq mudafaası) partiyası

Ukraina Yuqarı Şurasına seçimler 2012 senesi oktâbr 28-de olacaq.

Birleşken Muhalifetniñ “Batkivşçina” (Vatan) Bütünukrain Birleşmesi ve Qırımtatar MilliyMeclisiniñ

Müşterek Beyanatı

Ukrainanı  demokratik inkişaf, iqtisadiy ve sotsial medeniy ilerilev yoluna qaytarmaq, insan aq-uquqlarınıñ qorçalanmasını teminlemek, ayatnıñ siyasiy, uquqiy, iqtisadiy ve içtimaiy saalarında adaletni tiklemek maqsadınen Qırımtatar MilliyMeclisi ve Birleşken Muhalifetniñ “Batkivşçina” (Vatan) Bütünukrain Birleşmesi aşağıdakiler boyunca añlaştılar:

Qırımtatar MilliyMeclisi ve Birleşken Muhalifetniñ “Batkivşçina” (Vatan) Bütünukrain Birleşmesi Ukrainanıñ demokratik inkişafına, bütün millet ve dinler vekilleriniñ aqları ve serbestligini qoruvğa zarar ketirecek er angi telükege qarşı küçlerini birleştireler.

Birleşken Muhalifetniñ “Batkivşçina” (Vatan) Bütünukrain Birleşmesi,Sovet rejiminiñ zulumına oğrağanQırımtatar halqınıñ siyasiy, iqtisadiy ve sotsial medeniy aqlarınıñ ğayrıdan tiklenilmesi boyunca talaplarına qoltuta. Ve bu 7-nci çağırılış Ukraina Yuqarı Şurasında Birleşken Muhalifetniñ parlament fraktsiyasınıñ çalışmalarında öz ifadesini tapacaq, 

Birleşken Muhalifetniñ “Batkivşçina” (Vatan) Bütünukrain Birleşmesi  Qırımtatar halqınıñ menfaatlarını Ukraina Yuqarı Şurasında Qırımtatar Milliy Meclisniñ teklifinen Birleşken Muhalifetniñ saylav cedveline kirsetilgen namzetler vastasınen taqdim etecek.

Qırımtatar Milliy Meclisi, Birleşken Muhalifet “Batkivşçina” (Vatan) Bütünukrain Birleşmesiniñ siyasiy pozitsiyası ve programmasına,  Birleşken Muhalifetniñ  ğaye ve printsipleriniñ yayğınlaştırılmasına qoltutıp, Birleşken Muhalifetniñ  2012 senesi parlament saylavlarında ğalebesini teminlemek içün küç-ğayreti ile areket etecek. Biz birlikte  Ukrain tiliniñ devlet statusını er angi basqılardan qorçalamaq ve Ukrainadaki tamır halqlar ve milliy azlıqlarnıñ tilleriniñ eksiksiz qullanılması içün er şeyni yaparmız. 

Qırımtatar Milliy Meclisi ve Birleşken Muhalifetniñ “Batkivşçina” (Vatan) Bütünukrain Birleşmesi 2012 senesi parlament seçimlerinde qanunğa riayet etilmesi, saylav ceryanınıñ bütün basqıçlarında iştirakçileriniñ episine adaletli, açıq neticelerni elde etmeleri  içün  musaviy imkânlar berilmesi meselelerinde  beraber çalışacaqlar.

Birleşken Muhalifetniñ “Batkivşçina” (Vatan) Bütünukrain Birleşmesi Keñeşiniñ Reisi

Arseniy Yatsenük

Qırımtatar Milliy Meclisiniñ  Reisi

Mustafa Cemilev

Birleşken Muhalifetniñ “Batkivşçina” (Vatan) Bütünukrain Birleşmesi Merkeziy Saylav Ştabınıñ Reisi

Aleksandr Turçinov