2012 senesi iyül 25 künü Kiyevde OSCE Milliy azlıqlarnıñ işleri boyunca aliy komissarı K. Vollebek Meclis reisi Mustafa Cemilevnen körüşti

25 Iyül 2012

2012 senesi iyül 25 künü Kiyevde Ukraina Yuqarı Şurasınıñ resmiy körüşüvler salonında Ukrainada 4 künlük ziyaretnen bulunğan OSCE Milliy azlıqlarnıñ işleri boyunca aliy komissarı Knut Vollebek Qırımtatar halqı Meclisiniñ reisi Mustafa Cemilevnen körüşti.

Körüşüvde Qırım Muhtar Ceumhuriyetinde etnik siyasiy vaziyetnen bağlı meseleler, milliy mensüpligi boyunca sürgün etilgen şahıslarnıñ aqlarını ğayrıdan tiklevni teminlegen qanunlarnı qabul etüv ketişatı, Ukrainada qırımtatarlar ve diger sürgün etilgen halqlarnıñ meselelerini muzakere etecek halqara forumnıñ keçirilmesine dair mesleler köterildi.

Meclis reisiniñ memleketniñ yañı parlamentini seçüv Ukrainanıñ etnik milliy ayatına dair müim meselelerniñ çezimine tesir etmesi boyunca fikiri Aliy komissarnıñ diqqatını ziyade çekti.

Körüşüvde köterilgen müim meselelerniñ muzakeresi iyül 26 künü Qırımda devam etti.