Qurultay M.Cemilev ve R.Çubarovnı Ukraina halq deputatlığına namzet olaraq tevsiye etmek qararını aldı

22 Iyül 2012

Qırımtatar halqı V çağırılışı 4-nci sessiyasınıñ delegatları Qırımtatar halqı Meclisiniñ reisi M.Cemilev ve onıñ birinci muavini R.Çubarovnı Ukraina halq deputatlarını saylavlarda iştirak etmek içün cevelge kirsetilmesi içün Ukraina halq deputatlığına namzet olaraq tevsiye etmek qararını aldılar.

Mezkür qarar içün Qurultaynıñ iyül 22 künü qayd etilgen delegatlarnıñ çoqluğı rey berdi.

Qurultay delegatlarınıñ fikrince, qabul etilgen qarar halqnıñ vekâletli organınıñ yolbaşçılarına işanç artqanından delâlet bere. Bu insanlar Ukraina parlamentine saylanğanları taqdirde qırımtatarlarnıñ menfaatlarını taqdim etecek ve qorçalaycaqları şübesizdir.

Şunı hatırlatamız ki, iyül 21-22 künleri Aqmescitte Qırımtatar halqı V çağırılış Qurultayınıñ 4-nci sessiyası olıp keçti. Eki künlük iş devamında Qurultay delegatlarını saylav printsipleri, 2012 senesi oktâbr ayında olacaq Ukraina halq deputatlarını saylavlar, qırımtatar halqınıñ resmiy simvolları – milliy bayraq, tuğra ve gimni, Qırımtatar halqı Qurultay delegatlarını saylav boyunca Merkeziy saylav komissiyası aqqında meseleler baqıldı.

Kurultay işinde 200 delegat, Ukrainada akkreditatsiyadan keçken elçilikler, halqara teşkilâtlar, Ukraina ve Qırım akimiyetiniñ ve bunıñ kibi de Amerika, Türkiye, Romaniyadaki qırımtatar diasporasınıñ vekilleri iştirak ettiler.