V Qurultay delegatı R.Ümerov qırımtatar milliy biznesniñ inkişafına qoltutuv meselesini Qurultay ve Meclis faaliyetiniñ bütün esas yönelişleriniñ kün tertibine kirsetmekni teklif etti

22 Iyül 2012

2012 senesi iyül 21 – Qırımtatar halqı 5-nci çağırılış Qurultayınıñ birinci iş künü 2012 senesi oktâbr ayında Ukraina halq deputatlarını saylav meselesini muzakere etüv çerçivesinde Qurultay delegatı Rustem Ümerov maruzanen çıqışta bulundı.

Onıñ fikrince qırımtatar meselesiniñ siyasiy-uquqiy taraflarını çezüv qırımtatar halqınıñ avdeti, yerleşmesi ve aqlarınıñ tiklenmesinen bağlı diger meselelerniñ çezilmesine siltem olacaq.

“Ebet, biz añlaymız, bu saa Qurultay delegatları ve olardan ibaret milliy organlarnıñ ayrıca diqqatı altındadır”, – dedi R. Ümerov.

Qırımtatar halqı Qurultayınıñ azası, iş adamı ve cemaat birleşmeleriniñ iştirakçisi olaraq Rustem Ümerov Qurultay delegatlarına qırımtatar milliy biznesniñ inkişafına qoltutuv meselesini Qurultay ve Meclis faaliyetiniñ bütün esas yönelişleriniñ kün tertibine kirsetmekni teklif etti .

“Maña bu meselede qoltutmañıznı ve bu teklifimni Qurultay toplaşuvınıñ protokolına Qırım halqara biznes birliginiñ teşebbüsi sıfatında kirsetmeñizni rica etem”, – dedi Ümerov Qurultay delegatlarına hıtaben.

Aynı zamanda, natıqnıñ aytqanına köre yañı deñişmeler sayesinde qırımtatar cemiyetinde, olsun Qırımda, olsun – onıñ tışında yaşağan ve Ukraina, Avropa, türk ve islâm dünyasındaki iş adamları özlerini kösterip başladılar.

“Qırım inkişafı vaqufı” Hayriye teşkilâtına yolbaşçılıq yapqan delegat Rustem Ümerov qırımtatar cemiyetinde qırımtatar iş adamlarınıñ rolü bugünkisinden de büyük olur. “2011-2012 sene içinde qırımtatar iş adamları amelge keçirgen işler bizim daa yolnıñ eñ başında olğanımıznı köstere”, – dep qayd etti.

Bundan da ğayrı Qurultay delegatı R. Ümerov emin ki, Qırımtatar halqınıñ Meclisi, öz-özüni idare etken milliy organ Qırımnıñ inkişafınen bağlı leyhalarnı amelge keçirüvde yardımcı olabilir.