«Batkivşçina» Birleşken Muhalifet keñeşiniñ başı A. Yatsenük V Qurultay delegatlarını iş başlanmasınen hayırladı

21 Iyül 2012

2012 senesi iyül 21-de Qırımtatar halqı V qurultayınıñ 4-nci sessiyası öz işini başladı. Meclis reisiniñ birinci muavini Refat Çubarov oqup eşittirgen hayırlavlar arasında “Batkivşçina” Birleşken Muhalifet keñeşiniñ başı A. Yatsenükniñ V Qurultay delegatlarına muracaatı da bar edi.

“Birleşken muhalifet adından siz, yeñilmez qırımtatar halqınıñ toluvekâletli vekillerine muracaat eterek, biz siziñ problemleriñizni, maqsadlarıñıznı añlağanımıznı, ağrıñıznı sezgenimizni ve milletlerara davanı qozğağanlarğa qarşı, tarihtan siziñ faciañıznı silip taşlamağa tırışqanlarnen küreşecegimizni bildirmek isteyim”, – dep yazıla Arseniy Yatsenükniñ muracaatında.

“Batkivşçina” Birleşken Muhalifet keñeşiniñ başı A. Yatsenük şunı da qayd ete ki, bugünde-bugün Ukrainanıñ bütün vatandaşları mürekkep bir aldalar: ya da insanlarnıñ ve halqlarnıñ aqlarını tar-mar etken, qabar alıcı, hırsız ükümranlıq ya da insan ve milletniñ degerligini qorçalamağa bilgen mesülietli avropa devletini seçmek kerek.

“Batkivşçina” Birleşken Muhalifet keñeşiniñ başı A. Yatsenük bugünki ve kelecjek nesil ögünde mesüliet taşığan Ukraina vatandaşları bu vaziyetten çıqmaq yollarını tapacaqlarına eminligini bildirdi.