Mesheti türklerniñ «Vatan» halqara cemaat teşkilâtı Qurultay işinde iştirak etti

21 Iyül 2012

21 iyül künü Aqmescitte Qırımtatar halqı U Qurultayınıñ 4-nci sessiyası olıp keçti.

Qırımtatar halqı U Qurultayınıñ 4-nci sessiyasınıñ işinde 200 delegat, Ukrainada akkreditatsiya yapılğan elçiliklerniñ, halqara teşkilâtlar, Ukraina ve Qırım ükümeti, Amerika, Türkiye ve Romaniyadaki qırımtatar diasporasınıñ vekilleri faal iştirak ettiler.

Delegatlarnı Mesheti türklerniñ “Vatan” halqara cemaat teşkilâtınıñ reisi Cavid Aliyev hayırlap, Qurultayğa davet etkenleri ve qardaş mesheti türklerniñ problemlerine daima diqqat ayırğanları içün teşekkür bildirdi.

“Halqlarımıznıñ taqdirindeki facialı vaqialar bizlerni ebediyen bağladı ve biz biri-birimizge eñ yaqın halqlar oldıq” _ dede Aliyev. C. Aliyev reisligindeki teşkilât insan ve halqlarnıñ aqlarını qorçalağan teşkilât ve institutlarnen bağ tutmaq ve işbirlikte bulunmaq oğrunda yapqan faaliyeti aqqında ikâye etti.

Mesheti türklerniñ “Vatan” halqara cemaat teşkilâtı faal iş alıp bara ve Gürcistan mesheti türklerniñ meselesini tanımasınıñ teşebbüsçisi oldı, – qayd etti Aliyev.

– Gürcistan sürgün etilgen mesheti türklerni qaytarmaqnıñ müddeti boyunca Avropa Şurası ögünde mecburiyet aldı, – dep haber etti Aliyev. Amma, Aliyevniñ aytqanına köre, Gürcistan alınğan mecburiyetni nasıl yerine ketirmek kerekliginiñ şimdilik çaresini tapmağan. Belki qırımtatarlarnıñ qaytuv tecribesi mesheti türklerniñ tarihiy topraqlarına avdeti meselesini çezüvde numbüne olabilir, dep ümüt ete Aliyev.

Mesheti türklerniñ “Vatan” halqara cemaat teşkilâtınıñ reisi Cavid Aliyevniñ bildirgenine köre onıñ teşkilâtınıñ baş vazifesi mesheti türkler cemaat areketini ğayrıdan qurmaq ve canlandırmaqtır.