Öleg Zarubinskiy 5-nci Qurultay delegatlarına qırımtatar halqı ve umumen Ukraina devletiniñ menfaatlarını qorçalavda muvafaqiyetler tiledi

21 Iyül 2012

2012 senesi iyül 21-22 künleri Aqmescitte 5 Qurultaynıñ 4-nci sessiyası olıp keçti.

Eki kün devamında delegatlar Qırımtatar halqı qurultayına delegatlarnı saylav printsipleri, 2012 senesi oktâbr ayında olacaq Ukraina halq deputatlarını saylav, qırımtatar halqınıñ resmiy simvolları – gimn, gerb ve bayraq aqqında ve Qurultay delegatlarını saylav boyunca Merkeziy saylav komissiyasını tertip etüv meselelerini muzakere ettiler.

Qurultaynıñ işinde 200-ge yaqın delegat, Ukrainada akkreditatsiya yapılğan elçilikler, halqara teşkilâtlarnıñ ve bunıñ kibi de Türkiye, Romaniya, Amerikadaki qırımtatar diasporasınıñ vekilleri iştirak ettiler.

Meclis reisiniñ birinci mukavini Refat Çubarov oqup eşittirgen hayırlavlar arasında Ukraina Yuqarı Şurası İnsan, milliy azlıqlar ve milletlerara munasebetler boyunca komitet reisi Öleg Zarubinskiyniñ telegramması da bar edi.

“Qurultay ve onıñ vekâletli organı olğan Mejlis qırımtatar halqınıñ menfaatlarını temsil etkeni ukrain demokratik cemiyetniñ müim faktorıdır, – denile Öleg Zarubinskiyniñ muracaatında. – Müimi şu ki olar qırımtatar halqınıñ kündelik yaşayışına dair meselelerni çezüvniñ yollarını araştırıp tapmağa iqtidarlılar”.

Ukraina Yuqarı Şurası İnsan, milliy azlıqlar ve milletlerara munasebetler boyunca komitet reisi Öleg Zarubinskiyniñ muracaatında denile ki: Komitetimizniñ erkânına Meclis reisi, Ukraina halq deputatı Mustafa Cemilev de kirgeninden pek memnünmiz. Onıñ ile işbirligimiz sayesinde qırımtatar halqını qaytaruv, yerleştirüv ve aqlarını tiklev boyunca devlet siyasetine tesir etüv usullarını tapamız.

Soñki vaqıtta semereli çalışuvımıznıñ neticesi olaraq Ukraina Yuqarı Radasınıñ “Milliy mensüpligine köre sürgün etilgen insanlarnıñ aqlarını ğayrıdan tiklev aqqında” Qanun leyhasını birinci oquvda qabul etkenini qayd etebilemiz”.

Ukraina Yuqarı Şurası İnsan, milliy azlıqlar ve milletlerara munasebetler boyunca komitet reisi Öleg Zarubinskiy qayd etti ki, Qurultaynıñ 4-nci sessiyası ukrain devleti içün mesülietli bir devir – parlament saylavları arfesinde keçe. Onıñ fikrince Qurultay delegatları Ukraina Yuqarı Şurasında kimlerni vekil olaraq köreceklerini belgilemeliler.

Öleg Zarubinskiy 5-nci Qurultay delegatlarına qırımtatar halqı ve umumen Ukraina devletiniñ menfaatlarını qorçalavda muvafaqiyetler tiledi